أحمد سعد: "عملت أغنية معرفش مين اللي ملحنها"

كشف المطرب أحمد سعد، عن تقديمه أغان لا يعلم من صاحب ألحانها، ومن تلك الأغاني أغنية "سودة سودة"، والتي من المقرر طرحها قريبا.

وقال أحمد سعد عبر لقائه بإذاعة إنرجي "مرة عملت أغنية معرفش مين اللي ملحنها، ومن كتر ما الأغنية حبيتها وعجباني حفظتها كلها من المرة دي وبحبها أوي، وبعد ست تمن سنين بتيجي على بالي كل شوية، والأغنية دي هتنزل اليومين الجايين".

وتابع “كنت هموت وأجيب من اللي ملحن الأغنية دي، وكلمت محمد محسن وقلت أنا بحبها جدا، وعايز أعملها، وهنزلها ونكتب (ألحان ابقى كلمنا)، ولفيت على كل الملحنين في مصر”.

وأردف "وبعد عشر سنين تحديدا الشهر اللي فات كنت قاعد أنا وإيهاب عبدالواحد قلت له عايز أعمل حاجه زي (أشكي لمين) لأن الناس لسة بتحبها، فقال عندي أغنية وقام غنا نفس الأغنية قلت له الأغنية دي مسروقة، من عيل صغير جالي زمان قالي دي أنا، قلت له يا نهار يعني عايش معاك طول الفترة دي ومسألتكش، والواحد لما بيخلص ربنا بيكرمه الأغنية دي فضلت مستنياني 10 سنين اسمها "سودة سودة".

برومو ألبوم حبيبنا لأحمد سعد

وفي وقت سابق، نشر أحمد سعد فيديو دعائي للترويج للألبوم الجديد، "حبيبنا" بدأ من منطقة القاهرة التراثية بمشاهد جذابة وتحدث عن تحقيق حلمه قائلًا: "حاجة جميلة جدا يكون عندك حلم والأجمل منه إنك تحققه".

وأضاف: “طول عمر أحلامي ملهاش سقف، وأنا صغير كنت بحب المزيكا أوي كنت بشوف كل حاجة ألحان حتى الكلام كنت بشوفه لحن، كان إخواتي بيستغربوا، وأنا صغير إزاي طفل يحفظ الحاجات التقيلة دي كنت بسمع مشايخ وأم كلثوم وعبد الوهاب، وكنت بسأل نفسي هتغني إيه".