أحمد سعد يعرض "تجربته الحياتية" في تقديم ألبوم "حبيبنا"

شوق الفنان أحمد سعد جمهوره لألبومه الغنائي الجديد، والذي يحمل اسم “حبيبنا”، المقرر إطلاقه عبر جميع منصات الموسيقى بدءًا من 15 يناير الجاري.

ونشر أحمد سعد عبر جميع منصاته على مواقع التواصل الاجتماعي فيديو دعائيا بدأ من منطقة القاهرة التراثية بمشاهد رائعة وتحدث فيه عن تحقيق حلمه قائلا: "حاجة جميلة أوي يكون عندك حلم والأجمل من كده إنك تحققه".

وتابع أحمد سعد: “طول عمر أحلامي ملهاش سقف، وأنا صغير كنت بحب المزيكا أوي كنت بشوف كل حاجة ألحان حتى الكلام كنت بشوفه لحن، كان إخواتي بيستغربوا، وأنا صغير إزاي طفل يحفظ الحاجات التقيلة دي كنت بسمع مشايخ وأم كلثوم وعبد الوهاب، وكنت بسأل نفسي هتغني إي”.

محتاج حب الناس

وأضاف سعد: “كنت بسمع كل أنواع الموسيقى كنت بدور على شكل الناس تشوفني فيه واتصدمت أول صدمة عرفت إن الطريق مش سهل، كنت محتاج الناس تحبني وفضلت أسعى وأسعى وأعمل أشكال جديدة في المزيكا قعدت 15 سنة بعمل اللي بحبه واللي الناس بتحبه أشوف زمايلي بتعمل إيه علشان أشوف اللي الناس بتحبه”.

وتابع أحمد سعد: “وصلت إن أعمل اللي الناس بتحبه بالطريقة اللي بحبها وجه النجاح اللي مجاش بين يوم وليلة الناس بقت تحبني وتحب أغانيا وبقيت ببقى طاير في السما وأنا طاير على المسرح، الناس بتغني ورايا وبتقول إيه اليوم الحلو ده، ووسع وسع، وعرفت إن المسئولية ابتدت، أنا محتاج أعمل اللي الناس بتحبه واللي أنا بحبه وأنا مصدق إن اللي بتحبه من قلبك الناس هتحبه معاك، وهي دي تجربتي المرادي هعمل اللي بحبه وهاخد الناس وهطير في السما باللي أنا بحبه الأيام الجاية هتعرفوا أي هي التجربة”.

الفنان أحمد سعد

وكان الفنان أحمد سعد حقق نجاحًا جماهيريا كبيرًا خلال الفترة الماضية من خلال إطلاقه عددا من الأغاني، وأيضا خلال وجوده في أضخم حفلات عام 2024 في مصر والدول العربية بجانب تقديمه حملات إعلانية ناجحة.