تبكي من الوجع.. ياسمين رحمي تكشف تفاصيل إصابة والدتها في مسلسل 80 باكو

كشفت الفنانة ياسمين رحمي تفاصيل إصابة والدتها الفنانة عفاف مصطفى أثناء تصويرها مسلسل 80 باكو، المقرر عرضه ضمن قائمة مسلسلات رمضان 2025.

تفاصيل إصابة عفاف مصطفى

وقالت ياسمين رحمي أثناء مداخلة هاتفية في برنامج “تفاصيل” المذاع على قناة صدى البلد: “اللي حصل إن وهي بتصور مسلسل 80 باكو كان عندها مشهد أكشن وفي خناقة وهي كانت لابسة في إيديها خواتم حجمها كبير فالمشهد اتصور أكتر من مرة فضلوا يعيدوا ويزيدوا فيه”.

وأضافت رحمي: “المشهد عبارة عن إنها بتضرب حد وحد بيتخانق معاها فمن كتر إعادة المشهد صباعها اتعوج بسبب الخاتم اللي كانت لابساه خبط في الحيطة، فجأة صباعها دا ورم جدًا ومكانتش عارفة تفتح وتقفل إيديها”.

واستكملت ياسمين: “روحنا المستشفى وعملت إشاعة عليه اكتشفا وجود شرخ في الصباع نفسه ولازم يتجبس لمدة شهر وهي للأسف مخلصتش تصوير أعمالها وطبعا لإنها مكانتش بجبس في المشاهد اللي قبل كدا فاتضطرت تركب حاجة اسمها دعامة، والحمد لله هي دلوقتي أحسن الورم اللي كان في إيديها خف جدًا بشكل كبير”.

شغلانة الفن مش سهلة

أما عن تصريحها مؤخرًا عن صعوبة مهنة الفن، قالت: “قولت كدا من كتر خوفي عليها ودي أصلًا حقيقة، هي قاعدة بتبكي من الوجع ورغم كدا كانت مكملة التصوير الناس متخيلة إننا بنروح نلعب ونهرز وناخد فلوس ونبقي مبسوطين”.

واختتمت: “في خبايا وحاجات كتير الجمهور ميعرفهاش زي مثلا يكون عندنا حد تعبان جدًا وسيباه وتنزلي تصوري أو إنتي نفسك تبقي تعبانة ومكسورة ونازلة تصوير، أنت لو موظف وتعبت هتسلم شهادة مريضة وهتقعد لكن إحنا معندناش الكلام ده”.

أبطال مسلسل 80 باكو

يجمع مسلسل "80 باكو" بين نخبة من النجوم، من بينهم رحمة أحمد فرج، ومحمد لطفي، ومحمود يسري، ودنيا سامي.

المسلسل من إخراج كوثر يونس، المعروفة بفيلمها الناجح "مقسوم"، وتأليف الكاتبة غادة عبدالعال، التي قدمت مؤخرًا مسلسل "البحث عن علا" الذي حقق نجاحًا كبيرًا وتصدر قوائم المشاهدة في عدد من الدول العربية.

عدد حلقات مسلسل 80 باكو

ويتكون مسلسل 80 باكو من 15 حلقة، إذ ينتمي لفكرة الدراما القصيرة، لكن لم يتم الكشف حتى الآن موعد عرض المسلسل إذا كان بالنصف الأول أم الثاني من رمضان.