"قلبي إتوجع على أبويا".. انهيار نجل سائق كمبوند الفردوس (فيديو)

كريم
فتحي حسين-خلود طارق
قرر قاضى المعارضات تجديد حبس المتهم بالاعتداء على سائق بكمبوند الفردوس بأكتوبر 15 يوما على ذمة التحقيق.
قلبي وجعني على بابا
وقال كريم إسماعيل، نجل المجني عليه في واقعة كمبوند الفردوس: "لما شوفت أبويا بيتضرب في الفيديو أنا اتوجعت زيه، وفضلت مستني أبويا في الشارع لغاية لما رجع، لما شوفته فضلت أعيط وحسيت قلبي هيقف".
مش مسامح في حقه
وأكد الطفل كريم، في تصريحات لـ"تليجراف مصر": "أنا وأمي وإخواتي كلنا فضلنا نعيط لما شوفنا بابا، لأن أبونا بيصلي الفجر وينزل يشتغل بالعربية وبيرجع قبل الفطار بنص ساعة، علشان يجيبلنا مصاريفنا مش يتضرب وعربيته تتكسر، وهي مصدر رزقنا، وبقول للمتهمين حسبي الله ونعم الوكيل فيكم، أنا مش مسامح في حق بابا".
وأدلى المجني عليه بواقعة مشاجرة كمبوند الفردوس بأقواله أمام جهات التحقيق المختصة، كاشفًا تفاصيل الواقعة بداية من حادث الاصطدام بسيارته حتى الوصول لقسم الشرطة.
اعترافات المجني عليه
وحصلت "تليجراف مصر" على التحقيقات في القضية التي حملت رقم 1370 لسنة 2025 إداري ثالث 6 أكتوبر، حصر رقم 645 لسنة 2025.
وسأل رجال جهات التحقيق المجني عليه بواقعة مشاجرة كمبوند الفردوس عما حدث معه بالتفصيل، وأجاب: “اللي حصل إن أنا شغال على عربيتي شيفروليه فان بوصل مدرسة مش فاكر اسمها، بس يجيب الأطفال من كذا منطقة وكان آخر منطقة بنسبالي المفروض هروح أجيب منها الأطفال للمدرسة كانت هي الفردوس، وروحت فعلا وجبت الأطفال بتوع الفردوس فعلا جزء منهم وجزء كنت لسة بكمله”.
وأكل المجني عليه أقواله وقال: “وبعدين وأنا ماشي في شارع في الفردوس عند مدرسة الشهيد إيهاب مرسي كان في تقاطع، وأنا كنت ماشي في طريقي عادي عشان مكمل على طول في التقاطع، وأول لما طلعت العربية من الشارع لسة بعدي الطريق خلاص لقيت الست اللي هي معايا في المحضر جاية بسرعة و خبطتني بالعربية بتاعتها من وهي جاية على شمالي خبطت العربية عندي من الجنب من قدام”.
المجني عليه بمشاجرة الفردوس
وأضاف المجني عليه: “نزلت من العربية وهي نزلت لقيتها قعدت تزعق وشتمتني بس مش فاكر هي قالت إيه بس قولتلها أنا مش هتكلم معاكي، وفضلت واقف مستني نحل أو تشوف حد هييجي ولا إيه، لقيتها راحت مطلعة التليفون بتاعها وعملت مكالمة لقيت جوزها جالي ومعاه اثنين رجالة دول اللي شوفتهم جم بعدين”.
وأكمل حديثه: “الراجل الكبير جه وقالي إيه اللي حصل قولتله أنا ماشي في طريقي هي جاية بسرعة خبطتني من الجنب من قدام، راح قالي إزاي خبطتك قالي أنت غلطان قلت له أنا غلطان إزاي هي اللي خبطني من الجنب من قدام لما قولتله كده قعد يزعق ويشتم بس مش فاكر بالظبط قالي إيه الألفاظ، بعد كده في نص ما هو بيكلم لقيت واحد من عياله دخل قالي هات الرخص والبطاقة بتاعتك قولتله أنا مش هديك حاجة أنا هديها للقسم مش هديهالك أنت، راح ماسك فيا وضربني وابنه الثاني معاه راح ضاربني بردو من ورا كده على دماغي”.
كواليس مشاجرة كمبوند الفردوس
وأنهى السائق حديثه أمام رجال جهات التحقيق: “الراجل الكبير راح جاي على العربية عندي قعد يكسر في الزجاج بالكوريك بتاع عربية، وفي حد منهم ساعتها قالي أنا هموتك النهارده ومش هسيبك، لما لقيتهم بيكسروا في العربية وقفت اتفرج وسبتهم مردتش أعملهم حاجة، لقيت العربية اتكسرت كلها والفوانيس كلها والإكصدامات كلها وبعدين الناس اتلمت في المكان، وأنا ساعتها كنت مصدوم ومش مصدق اللي حصل، وروحت على قسم ثالث وكان ساعة الموضوع ده لما لقيت العربية بتكسر كده وأنا لوحدي كلمت ابن عمى وواحد بلدياتي ده جه أخدني على القسم وسبت العربية في مكانها واقفة”.

أخبار ذات صلة
بعد 13 سنة هروب.. القبض على صاحب "السراج مول" بمطار القاهرة
15 مارس 2025 06:30 م
قدرات قتالية.. الداخلية تستعرض جهود المرأة في العمل الأمني (فيديو)
15 مارس 2025 06:27 م
قتلتهم قبل السحور.. معلومات جديدة بشأن الأطفال ضحايا والدتهم بالخانكة
15 مارس 2025 06:06 م
بسبب 60 مليون قطعة ألعاب نارية.. 1339 متهمًا في قبضة الأمن
15 مارس 2025 05:49 م
بحركات خادشة للحياء.. ضبط شخص ضايق الفتيات في الشارع
15 مارس 2025 05:30 م
اندلاع حريق بمخزن مقرمشات في الخانكة.. والدفع بـ9 سيارات إطفاء
15 مارس 2025 04:41 م
بعد تخفيف العقوبة.. السجن 7 سنوات لسائق قتل أمين شرطة بالمنيا
15 مارس 2025 04:33 م
أمن بورسعيد يضبط متهمين اعتدوا على فتاة بمسدس مياه
15 مارس 2025 04:21 م
أكثر الكلمات انتشاراً