بعد منشور شاب.. الشرطة تبحث عن والدة "طفلة التسول" بالتجمع

تكثف أجهزة الأمن بمديرية أمن القاهرة، جهودها للقبض على متسولة تركت طفلتها الصغيرة وعمرها عامين في الشارع بمفردها أمام مول شهير في التجمع الخامس.

وتداول رواد مواقع التواصل الاجتماعي، منشورا لشاب يدعى مايكل مكرم يروي فيه تفاصيل عثوره على الطفلة، قائلا إن الأم اعتادت تركها بهذا الشكل، ويقوم الأهالي بنقلها لقسم الشرطة كل فترة.

منشور على فيسبوك

وروى الشاب مايكل مكرم، تفاصيل عثوره على الطفلة في منشور عبر فيسبوك، موضحا: “كنت ماشي بالعربية الساعة 12 الظهر وبلف اليوتيرن قدام مول the nox في التجمع الخامس، ولقيت على الجزيرة في نص شارع التسعين بنت عندها حوالي سنتين شكلها ولبسها مبهدل أوي وواقفة لوحدها على طرف الرصيف وواقف جنبها شاب لابس كويس وغالبا بيحاول يفهم دي تايهة من مين”.

وأضاف صاحب المنشور: “وقفت بالعربية وسألته قالي إنه هو كمان وقف لما لقاها واقفة على الرصيف وممكن تنزل الشارع وهي مش واخدة بالها (البنت صباع إيديها مفتوح جامد ووارم وشكله جرح بقاله فترة ومحدش نضفه ورأسها فيها خبطة واضحة)، دورنا على رقم خط نجدة الطفل 16000 واتصلنا بيه حوالي 3 مرات كان مرفوع من الخدمة، وبعدها لما الخط جمّع وردوا قالوا لي لازم توديها القسم تعمل هناك محضر وإحنا بنيجي نستلمها من القسم”.

تسول 

وتابع: “وإحنا واقفين عرفنا من أمن المول والكناسين في الشارع أن أهلها شحاتين سيبينها هناك من بعد الفجر، وبيجوا يكملوا شحاتة بيها (وقت الفطار أكيد) ويسيبوها تاني، ساعتها صممت إني أوديها القسم، ولقيت شاب لطيف من المول عرض أنه يجي معايا، وست جميلة عندها صالون تجميل في المول جت هي وبنت شغالة معاها وركبوا معايا العربية ورحنا على قسم التجمع الخامس". 

وأوضح: “أول ما الضابط شافنا داخلين بالبنت لقيته بيقول البت دي تاني، والمخبرين اللي معاه لقيتهم بيقولوا لي مش إنت لقيت البنت دي عند الملف اللي قدام المول في شارع التسعين.. طلع إن البنت دي أمها بتسيبها هناك لوحدها كذا مرة لدرجة أن في ناس كانت بتجيبها القسم زينا بالضبط، وطلبت منهم في المباحث أنهم يعملوا محضر للأم”.