"فخورين إن مصري هيعملها".. عمرو عاكف يكشف سبب اعتزال محمد سامي

دعم المونتير عمرو عاكف، المخرج محمد سامي بعد قراره اعتزال الإخراج والسفر خارج البلاد.

وقال عاكف عبر "فيسبوك": “محمد سامي واخد القرار ده من فترة كبيرة جدا، ومن قبل رأس السنة حصل مكالمة شرحلي ليه ناوي يعمل كده.. محمد سامي عنده خطوة كبيرة عالميا هتخلينا كلنا نبقي فخورين إن مصري اللي عاملها، خطوة وسط نجوم عالميين كبار هو يستاهل يبقي وسطهم.. بالتوفيق في اللي جاي يا أشطر وأغلى وأنجح مخرج وأخويا الكبير”.

اعتزال محمد سامي 

وكان محمد سامي قد أعلن اليوم اعتزاله عن الإخراج التليفزيوني في الدراما، وسفره خارج البلاد، بعد مسيرة طويلة استمرت لمدة 15 عاما.

وقال عبر صفحته على "فيسبوك": “وداعا الدراما التلفزيونية السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور، يمكن المقربين ليا عارفين إني واخد القرار ده من فترة وهو اعتزال الإخراج التلفزيوني ولكن كنت بنتهي من التزامات موقعة مع شركات ونجوم والحمد لله انتهيت منها وكان آخرها 2025، معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل”.

آخر أعمال محمد سامي الإخراجية

وكان آخر أعمال محمد سامي  الإخراجية هو مسلسل “إش إش” بطولة الفنانة مي عمر، والذي يعرض حاليا ضمن موسم دراما رمضان 2025.

كما يعرض في المارثون الرمضاني الجاري، مسلسل “سيد الناس” بطولة الفنان عمرو سعد،  من إخراج محمد سامي.