قتلوه وراحوا كلوا كشري.. تفاصيل اعترافات المتهمين بقتل شقيق محامي شبرا الخيمة

كشف المحامي وليد التميمي، شقيق المجني عليه “خالد” ضحية القتل والسرقة بالإكراه في شبرا الخيمة، كواليس أولى جلسات محاكمة المتهمين بقتل موكله في محكمة جنايات شبرا. 

شقيق المجني عليه في شبرا يكشف كواليس القضية 

وأوضح التميمي، في مقطع فيديو لـ “تليجراف مصر”، أن دفاع المتهمين مكون من 9 محامين، وتقدموا في أولى جلسات محاكمتهم اليوم، بعدة طلبات كان أبرزها استدعاء مجري التحريات في القضية، والضابط مستقبل البلاغ بالعثور على الجثة لسماع أقوالهما، كما طالبوا بعرض تقرير الصفة التشريحية للمتوفى، والذي أعده الطب الشرعي.

قتلوه وأكلوا كشري 

وأضاف شقيق المجنى عليه، أن أحد المتهمين اعترف أمام جهات التحقيق، بأن سبب قتله لـ"خالد" هو أنه تعرف عليه أثناء محاولة سرقته مع باقي المتهمين، قائلًا: “بصلي وقالي أنت من مسطرد، أنا عارفك وهجيبك”، فخشى المتهم من افتضاح أمره وأطلق عليه عيارا ناريا من فرد خرطوش، أودى بحياة المجنى عليه ولفظ أنفاسه الأخيرة في الحال، بعد أن لفظ بالشهادتين أمامه، وتابع التميمي أن المتهمين اعترفوا أمام جهات التحقيق أنهم قاموا بقتل شقيقه ثم ذهبوا لأحد محلات الكشري ليأكلوا.

تأجيل محاكمة المتهمين بقتل شقيق محامي شبرا 

وأجلت محكمة جنايات شبرا الخيمة، اليوم، أولى جلسات محاكمة المتهمين في واقعة قتل الشاب خالد، شقيق المحامي وليد التميمي، أسفل الطريق الدائري لجلسة 25 مايو المقبل.

وكشفت هند سعيد زوجة المجني عليه تفاصيل الواقعة في التحقيقات خلال حضورها لسراي النيابة.

وحصلت "تليجراف مصر" على نص التحقيقات وجاءت كالتالي:

س: ما سبب حضورك لسراي النيابة؟

ج: انا جيت النيابة عشان عايزة أقول إني اتعرفت على جثمان جوزي بمشرحة زينهم.

س: وما بيانات المتوفى إلى رحمة الله؟

ج: هو اسمه خالد مجدي شافعي توفيق وهو عنده 31 سنة.

س: وما علاقتك بسالف الذكر تحديدًا؟

ج: هو جوزي.

س: وما معلوماتك بشأن الواقعة محل التحقيقات؟

ج: "اللي حصل إن جوزي / خالد مجدي شافعي توفيق كان راجع من الشغل بتاريخ 2024/8/21 وحوالي الساعة 2:10 صباحًا لقيته اتصل عليا وقالي أنا راجع من الشغل وجيت اركب توكتوك قالي 30 جنيه وهو ما كانش معاه فلوس غير 45 جنيه وعايز يروح إمبابة عند أمه وفضل يكلمني على التليفون لحد ما سمعت صوت حد بيقوله الساعة كام وهو رد عليه وقاله 2:30 وفضل ماشي وهو بيكلمني في التليفون لحد لما حد تاني سأله قاله الاستيراد منين قاله معرفش كمل معايا على التليفون وبعد كده سأل واحد وقاله الدائري منين فسمعته قاله سيب أول سلم واطلع تاني سلم وبعد كده فضل معايا على التليفون لحد ما سمعت صوت حد بيقول لجوزي صوته تخين وصوت حد تاني بيقوله أقف يالا وشتمه وقاله مش بقولك أقف وشتمه تاني".

وأكملت: "بعدين سمعت صوت خالد جوزي بيقول للناس من غير ضرب وبيصرخ وبيقوله معايش حاجة تاخدوها انا معايش حاجة ولقيت خالد بيصرخ ويقول قتلوني ياهند وخدوا حاجتي اشهد أن لا إله إلا الله والخط قطع بيني وبينه وحاولت اتصل به تاني كان بديني جرز بس محدش كان بيرد عليه لحد الساعة 5 الصبح ومعرفتش حاجة عن جوزي وبعدين لقيت تلفونه اتقفل وكلمت أخوه وأمه محدش عارف عنه حاجة".

وتابعت: "تاني يوم كلمت النجده علشان أعرف جوزي فين ومعرفتش أوصل لحاجة ويوم 2024/8/23 أخوه وليد كلمني وقالي دورت على خالد في المستشفيات والأقسام ما وصلتش لحاجة لحد ما رحنا مشرحة زينهم نسأل على جوزي وهناك شفت جثته واتعرفت عليها أن دي جثة جوزي وكمان أخوه وليد اتعرف عليه وأخوه وليد راح قسم تاني شبرا الخيمة وعمل محضر إنه اتعرف على جثة جوزي خالد والنهارده جيت علي النيابة علشان أقول اقوالي واخد تصريح بدفن جثمان جوزي وده كل اللي اعرفه".

س: ومتى كانت مكالمتك مع المتوفى إلى رحمة الله؟

ج: أنا كلمته يوم 2024/8/21 حوالي الساعة 2:10 صباحًا.

س: وأين تحديدًا كان المتوفي إلى رحمة الله تعالى حال مكالمتك الهاتفية له؟

ج: هو ساعة لما كلمني كان لسة خارج من الشغل ورايح علي إمبابة.

س: وأين مكان عمل سالف الذكر تحديدًا ؟

ج: هو شغال في سوبر ماركت ألبان الصالح اللى في شارع الحجاز ميدان المحكمة مصر الجديدة.

س: ومتى تحديدًا انقطع الاتصال بينك وبين المتوفى إلى رحمة الله؟

ج: في نفس اليوم حوالي الساعة 3:15 صباحًا.

س: وهل نما إلى علمك مكان وجود المتوفى إلى رحمة الله خالد حدوث تلك الواقعة؟

ج: اللي اعرفه إن هو قالي هطلع الدائري اتجاه الوراق واركب عربية أروح إمبابة.

س: وما رقم الهاتف الذي كنت تتحدثي به مع المتوفى إلى رحمة الله؟

ج: أنا كنت بكلمه على تليفونه.

س: وما وصف الهاتف المحمول الخاص بزوجك؟

ج: هو تليفون ماركة نوكيا لونه أزرق في أسود وكان معاه تليفون تاني في خط تاني ماركة نوكيا لونه أبيض.

س: وهل تحدثتي مع زوجك المتوفى إلى رحمة الله على خط آخر خلاف الذي كنتي تتحدثين معه عليه؟

ج: أنا بعد ما الخط قطع اتصلت على الرقم التاني وكان بيدي جرس حوالي اربع مرات بس محدش رد وبعدها اتقفل.

س: ومتى تحديدًا علمتي بوفاة زوجك المجني عليه؟

ج: بتاريخ 2024/8/23 حوالي الساعة 10 مساءً.

س: وما كيفية علمك بوفاة سالف الذكر؟

ج: هو يوم 2024/8/23 أخوه وليد كلمني وقالي دورت على خالد في المستشفيات والأقسام ما وصلتش لحاجة لحد ما رحنا مشرحة زينهم نسأل على جوزي وهناك شفت جثته.

س: وهل تتهمي ثمة أحد بقتل المجني عليه زوجك / خالد مجدي شافعي؟

ج: أيوه الناس اللي أنا سمعت صوتهم في التليفون إنهم هما اللي قتلوا جوزي وسرقوا حاجاته.

س: وما المنقولات التي تمت سرقتها من المتوفى ؟

ج: هي عبارة عن شنطة كروس لونها كاكي فيها محفظته والأدوية اللي بياخدها وساعة يد رجالي فضى اللون لها إسورة أسود مطاط ماركة باتيك فليب وحظاظة ماركة حجر كريم فيروز وخاتم فضه عقيق وعدد اتنين جهاز تليفون ماركة نوكيا.

س: وملك من تلك المنقولات؟

ج: هي ملكه هو.

س: وبكم تقدر قيمة تلك المنقولات؟

ج: بحوالي 120 ألف جنيه.

س: وهل توجد ثمة خلافات بين المتوفى إلى رحمة الله وثمة شخص؟

ج: لا هو كان في حالة.

س: وما قولك فيما سطره المقدم / أحمد العربي مأمور قسم ثان شبرا الخيمة بمحضرة المؤرخ 2024/8/21 ؟
ج: هو جوزي واللي حصل أنا قولت عليه.

س: هل لديكي أقوال أخرى؟

ج: لا.