نجل ضحية "جائزة مدفع رمضان": "اشترينا ثلاجة وغسالة مستعملين"

“بوجه حزين وعين باكية”، بدأ شريف، نجل الحاجة نعيمة ضحية سرقة جائزة “برنامج مدفع رمضان” بمنطقة المعصرة، حديثه مع تليجراف مصر، وكشف تفاصيل الحياة القاسية التي يعيشها برفقة والدته المسنة. 

بشيل طوب وزلط على ضهري 

وقال شريف لـ"تليجراف مصر": “أنا شغال أشيل طوب وزلط على ضهري طول النهار عشان 120 جنيه، وعندي مشكلة في الفقرات، وجسمي كله جروح وغرز بسبب الشغل، وبحاول أساعد أمي وأخليها تقعد من الشغل، ولكن هي مصممة تنزل الشغل عشان ظروف المعيشة”. 

عاجزعن مساعدة أمي المريضة

وأضاف: “أنا بتصعب عليا أمي وهي بتبيع مناديل، وبتصعب عليا نفسي وبعيط بالدموع وأنا شاب بصحتي وعاجز عن مساعدتها، أنا نفسي تقعد من الشغل، وقلبي بيتقطع وأنا شايفها شغالة وهي ست صاحبة مرض، وأنا مش قادر أعملها حاجة”. 

 ثلاجة وغسالة

وتابع، “الجائزة اللي حصلنا عليها من محمد رمضان، تم سرقة معظمها، أثناء عودتها إلى منزلها، وتبقى من المبلغ  40 ألف جنيه اشترينا بيهم ثلاجة وغسالة مستعملين، واستعوضنا ربنا في المبلغ اللي اتسرق".

نفسي أمي تحج 

وأتم شريف حديثه، “أنا نفسي في مشروع أضمن بيه مستقبلي وأريح بيه أمي الشقيانة، ونفسي تزور بيت الله وتحج عشان هي تستاهل كل خير”.

الحاجة نعيمة تكشف تفاصيل سرقة جائزة محمد رمضان

وكانت الحاجة نعيمة، كشفت في حديثها لـ"تليجراف مصر" تفاصيل تعرضها لسرقة جائزتها من محمد رمصان قائلة: “كنت ببيع المناديل في الشارع تحت الكوبرى في المعصرة وفجأة قرب منى محمد رمضان والفريق بتاعه، ولما قرب مني حضني وقال لي: "أنا زي ابنك" سألني: "مين بيصرف عليكي؟" فقلت له: ربنا، وأعطاني المال ومدير البرنامج عرض عليّ توصيلي للبيت ورفضت".

وتابعت الحاجة نعيمة: “استوقفت ميكروباص للذهاب لبيتي في التبين لكن الناس تجمعوا حولي وتعرضت أنا وبنتي للضرب من ناس معرفهاش، وأغلب الفلوس اللي خدتها اتسرقت”.

مدفع رمضان

وبرنامج “مدفع رمضان” يعرض يوميًا بعد أذان المغرب مباشرة، في تمام الساعة السادسة مساء، عبر قناة دي إم سي، والإعادة في تمام الساعة 12:00منتصف الليل، وموعد الإعادة الأخرى في الساعة 12:00 ظهرًا على قناة الحياة.