زيزو: "الزمالك عملني.. بس ميدو هاجمني والجنايني هددني"

فتح نجم فريق نادي الزمالك، أحمد سيد “زيزو”، قلبه وكشف كواليس مثيرة عن مفاوضات تجديد عقده مع الأبيض، وتناقض مواقف بعض الشخصيات الزملكاوية المؤثرة، في تصريحات نارية نقلها الإعلامي هاني حتحوت.

وقال زيزو: "أيوه الزمالك اللي عملني وشهرني، بس بالتزامي وتطوري بقيت اللاعب الوحيد اللي بينافس على جايزة أفضل لاعب في أفريقيا. للأسف البعض بيتعامل معايا كأني عبء مش قيمة".

ميدو هاجمني 

وعن ميدو، علّق زيزو قائلًا: “ميدو بيتكلم عن تجديدي، لكن في ماتش مودرن قبل ما أعمل الأسيست في الكأس، كان بيهاجمني على الهوا وبيقول: ”ده اللي عايز الملايين دي؟".

وأضاف: “وأنا راجع من المغرب بعد حفل جائزة أفضل لاعب، حسين لبيب قال لي في الطيارة إن الزمالك هيدفع جزء من المقدم، وممدوح عباس جزء، والباقي هيدفعوه في شكل فيلا أقدر أتصرف فيها بعد سنتين".

عمرو الجنايني هددني 

ولم يخفِ زيزو انزعاجه من موقف عمرو الجنايني: "الجناينى شخصيًا بحبه وبحترمه، وعارف إنه عايز مصلحتي. لكن ما يصحش يقول للوسيط: لو زيزو مردش خلال أسبوع هننزل بيان! بيان؟ انتوا افتكرتوني بس لما جبت جولين مع المنتخب وجول قدام سيراميكا؟".

غششت حسين لبيب يتعامل ازاي مع بابا 

وتابع: "بقالي 7 شهور بتحايل عليكم نجدد مش عشان محتاج فلوس، عشان أساعد الإدارة تبقى الطرف الأقوى قبل ما ندخل في الوقت الضايع،  كنت بغشّش حسين لبيب يتعامل مع بابا إزاي ويقول إيه، وفي الآخر يقولوا لي قدامك أسبوع؟ لا طبعًا، مش قدامي أسبوع".

وختم زيزو تصريحاته قائلًا: "أنا والله رحت لشيكابالا بعد ما رفضت أحد العروض، وقلتله: أرجوك اتصرف مع الإدارة وخليهم يجددوا. ده حب للنادي، مش مزايدة".