زيزو: "ماوقعتش للأهلي.. ومليش دعوة بتوقيع بابا" (فيديو)

أطلق أحمد سيد "زيزو"، نجم نادي الزمالك، تصريحات نارية خلال نقلها مع الإعلامي هاني حتحوت، فتحت أبواب الجدل على مصراعيها بشأن مستقبله مع القلعة البيضاء، وسط تقارير قوية عن اقترابه من الأهلي.

وقال زيزو: "أحد المسؤولين قال لي الفترة اللي فاتت:" طيب مش لازم تكمل في الزمالك.. بس ماتروحش الأهلي هل دي عقلية سليمة؟ بدل ما نواجه ونقلل الفوارق مع منافسنا؟".

وأضاف: "هم اللي وصلوني إن يبقى قدامي اختيارات كاملة، وعلى فكرة والله عرض الزمالك هو الأقل مادياً، سواء من بره مصر أو حتى من العروض المحلية.. وماقصدش الأهلي".

وواصل حديثه: "هل ده معناه إن علاقتي بالزمالك انتهت؟ هل ده معناه إني مضيت للأهلي؟ لا طبعاً.. ماوقعتش للأهلي، ومالييش دعوة بابا وقّع على إيه ولا خد شيكات ولا لا". 

زيزو: "ماوقعتش للأهلي" 

وأشار زيزو إلى أنه حتى الآن لم يحسم وجهته، قائلاً: "الناس بتقول مخلص كل حاجة، طب لو كنت مخلص كنت هسافر جنوب أفريقيا في رحلة 17 ساعة من غير جيم ولا سبا ولا حتى فندق كويس؟".

لكنه عاد وأكد احترامه الكامل للنادي الأهلي وجمهوره: "الأهلي نادي محترم بحترمه زي ما بحترم الزمالك، والتاريخ مش بيتمسح، وحقي ألعب في أي مكان". 

وعن موقفه من الزمالك، قال: "أنا طلبت شيكات مكتوبة بس عشان أضمن حقي، العقد شريعة المتعاقدين، وليه تخسر واحد أثبت لك أكتر من مرة إنه بيحبك؟". 

واختتم زيزو تصريحاته الحاسمة قائلاً: "مش همسك قلم وأمضي غير لما أحسم موضوع الزمالك، وده اللي قلته لبابا، ومافيش حاجة اسمها توكيل عام في عقود الكورة.. أبويا لحد مارس ماقعدش مع ولا نادي احترامًا ليا ورغبتي".