إبراهيم سعيد: صلاح "بيحاربني.. اللي بيحصل ده عيب"

شن لاعب النادي الأهلي ومنتخب مصر السابق، إبراهيم سعيد، هجومًا ناريًا على نجم فريق ليفربول الإنجليزي، محمد صلاح، واتهمه بمحاربته عبر تدبير "حملة" ضده.

 وقال سعيد عبر برنامجه المذاع على شاشة قناة "النهار": "محمد صلاح بيلعب معايا لعبة، وأنا بحب المباريات، ودي لعبتي، وفي مواقف كتير بتأكد أنه شاغل دماغه بيا، وهو لو حطني في دماغه، ممكن ده يبعده شوية".

وأضاف سعيد: "الرزق ده بتاع ربنا، الحاجات اللي بتحصل دي عيب، واللي بتعمله بيوصلني، لما اتكلمت عليك اتكلمت في مواقف مع منتخب مصر ماتكلمتش على محمد صلاح لاعب ليفربول".

وتابع: "الأساليب اللي بتحصل معايا مش كرة، بس مش مشكلة أنا معاك وحاول مرة تانية وتالتة ورابعة، وممكن تكسب وممكن تخسر، بس انا بحب أتعامل في الحاجات دي بطريقة أفضل".

وأكمل لاعب منتخب مصر السابق: "أكتر واحد وقف معاك هو إبراهيم سعيد، وانت عارف ومتأكد لأن مفيش حاجة بتفوتها وبتتابع كل حاجة، وسيبك من كلام مش بتابع، انت بتتابع كل حاجة".

وواصل مدافع الأهلي الأسبق: "انت مستغرب أن إبراهيم سعيد بينتقدك، آه بنتقدك، انا كابتنك، وموضوع أنك تلعب اللعب ده مش حلوة، لأنك مش فوق النقد، ومن مصلحة الكرة المصرية انك تتعرض للنقد".

وقال سعيد موجها حديثه إلى صلاح: "نفسي أشوف محمد صلاح بتاع زمان، المتواضع اللي كان بيبقى ماسك المصحف في إيده، وسيبك من الكتب والحاجات اللي بتنزلها دي مابتأكلش عيش، عايز أشوف محمد صلاح اللي بيقدر كل الناس".