المتهم بقتل إيهاب أشرف: فصلت الرأس بسبب حجم "الكرتونة"

حصل موقع “تليجراف مصر” على النص الكامل لاعترافات “مُدرس الفيزياء” المتهم بقتل الطالب إيهاب أشرف، وقررت محكمة جنايات المنصورة إحالته للمحاكمة الجنائية العاجلة في جلسة 20 مارس المقبل.

وإلى نص التحقيقات..

س: ثبت من مناظرة النيابة العامة للجزء العلوي من الجثمان دون رأس من جثمان المجني عليه/ إيهاب أشرف عبد العزيز عبد الوهاب وجود قطع طولي بالظهر أسفل الكتف من الناحية اليمنى من الخلف بالقرب من مفصل الذراع الأيمن فمن محدث ذلك الجرح الإصابي؟

ج: أنا اللي عملته.

س: وما سبب وتوقيت إحداثك لذلك الجرح الإصابي المار ذكره؟ 

ج: أنا كنت بحاول أحطه جوه الكرتونة، بس الكرتونة كانت بتتفتح من الجانب فأنا حاولت أقطع الذراع زي ما قطعت الرأس.

س: وما الذي حال دون ذلك؟ 

ج: أنا حسبت أنه هياخد وقت كتير مني والمنطقة دي في الجسم فيها عظم جامد في المفصل وأقوى شوية من العامود الفقري.

س: وهل من ثمة آثار دماء المجني عليه/ إيهاب أشرف عبد العزيز عبد الوهاب لطخت بها ملابسك حال ارتكابك للواقعة؟ 

ج: أيوه فيه دم جه على البنطلون الجينز على الرجل اليمين أعلى الركبة والكوتشي بتاعي جه عليه دم من جانب وأسفل النعل والكم بتاع السويتشرت من ناحية الشمال جه على نقط دم.

س: وما الذي بدر منك حيال تلك الدماء التي استطالت ملابسك آنذاك؟ 

ج: أنا كان فيه إزازة مياه مسحت بيها البنطلون والسويتشرت والكوتشي لما مشيت بعد كده في الشارع جه عليه تراب واتمسح.

س: وما التصرف الذي بدر منك عقب إجهازك على المجني عليه/ إيهاب أشرف عبد العزيز عبد الوهاب وتثبتك من إزهاق روحه؟ 

ج: هو لما كان واقع على الأرض في الأوضة أسفل السبورة كان ظهره للسبورة ووشه ناحية الحجرة وكان على جانبه فأنا سبته على جنبه وبدأت إن أفصل جسمه علشان أقدر أحطه في الشكاير وفي الكرتونة اللي أنا كنت عارف إن هما موجودين في الأوضة وكنت ناوي إن أنا استخدمهم في إخفاء الجثمان.

س: وما هي الكيفية التي استخدمتها في التخلص من جثة المجني عليه/ إيهاب أشرف عبد العزيز عبد الوهاب عقب إجهازك عليه؟ 

ج: أنا لما تأكدت إن هو مات بدأت أقطع الهدوم بتاعته لأن لقيت حجمه كبير وقررت إن أنا أقطع الجثمان واستخدمت نفس السكينة اللي أنا قتلته بيها وبدأت أقطعه من الجانبين بشكل دائري لحد ما وصلت للعامود الفقري وساعتها قلبته على وشه وحطيت السكينة بين فقرة من فقرتين العامود الفقري وفضلت أدوس على ظهر السكينة برجلي لحد ما كسرت العظمة بتاعة العامود الفقري وفصلت الجثمان لنصفين، وبعد كده لما جيت أحط النصف العلوي في كرتونة فلقيت رأسه ظاهرة من الكرتونة، فقررت إن أفصل رأسه، فرحت ماسك السكينة وبشكل دائري لحد ما فصلت رأسه، وكده قسمت الجثمان ثلاثة أجزاء، الجزء السفلي ربطت رجليه الاتنين من الخلف بحبل دوبارة بتاعة الشيكارة الخيش في الحزام اللي كان لابسه إيهاب وحطيته في الشيكارة الخيش البني، وبعدين حيطته جوه الشكارة البيضاء البلاستيكية، وبعدين حطيته جوه الشيكارة الزرقاء وربطت الشيكارة بدوبارة من بتاعة الشيكارة الخيش والجزء العلوي من الجثمان عقب فصل الرأس فرشت الكرتونة بأكياس زبالة سوداء ولما جيت أحط فيها الجثة عقب فصل الرأس لقيت إن الزراع اليمين هيخرج بره الكرتونة فأنا حاولت إن أنا أقطعه بس لقيته هياخد وقت كبير، فحطيت الجزء العلوي من غير الرأس زي ما هو وحطيت الرأس في كيس أسود وحطيتها جوه الكرتونة وقفلتها بالغلاف بتاعها وقفلتها بجزء من الحبل الباقي من الشيكارة البلاستيك. 

س: وما الذي بدر منك عقب ذلك؟ 

ج: أنا بدأت أنضف الملابس بتاعي والأرض والسكينة منضفتهاش ورميتها زي ما هي في المصرف والحيطان نضفتها.