فارس: ندمان إني سبت الفن.. وأغانيّ اتسرقت

أعرب المطرب فارس، عن ندمه الشديد على تركه للوسط الفني لأكثر من 15 عاما، كما كشف عن تعرض 26 أغنية من إنتاجه للسرقة.

وقال فارس، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": لو رجع بيا الزمن مش هسيب الفن، أنا ندمان إني سبت الفن، وكان فيه اختيار خاطئ لشخصيات في حياتي".

كنت ممكن أعمل أغاني راب

وتابع: "لو مكنتش غبت عن الفن 15 سنة، كان ممكن تلاقوني عملت أغاني راب في فترة، أو كان ممكن أعمل أغنية مع مطرب مهرجان بشكل تاني ولغة جديدة وجريئة بس مش واقعة أوي".

وأكد فارس أنه سيعود للغناء مرة أخرى، قائلًا: وحشني الغناء وهعمل الحاجة اللي بحبها، والأغاني والكلام اللي أنا عيز أقوله هقوله لنفسي، وأنا ماحدش حاربني وأنا بعدت بكامل إرادتي، ممكن يكون في ناس اتبسطت أوي أني بعدت عن الفن، لكن ماحدش حاربني.

وكشف فارس عن سرقة أغاني من إنتاجه، قائلًا: في 26 أغنية من أجمل أغانيّ من إنتاجي اتسرقوا ونزلوا على قنوات يوتيوب، وربحهم بيروح لأصحاب القنوات، ومش عارف هرفع قضية على مين، هما مين أصلاً؟.

أما عن أول تجربة سينمائة له، فعلق فارس: فيلم جالا جالا، مكنتش فاهم يعني إيه سينما وأن مفيش نجومية أوي غير لما يكون أغنية دي بتاعتك، وحصل مشاكل كتير في الفيلم ده، وأحمد زكي الله يرحمه قالي أنا شوفت فيلم جالا جالا وبقولك اشتغل كتير ومبتصش وراك، وأنا لما بتفرج على نفسي من 20 سنة بضحك ولكن لو معملتش الأفلام دي مكنتش عملت السادات، ودي النصيحة اللي مخدتهاش منه الله يرحمه.

برنامج المنسي، من تقديم الإعلامية إنجي هشام على شاشة قناة هي، ويُعرض يوميًا في تمام الساعة العاشرة مساء، طوال شهر رمضان، ويستضيف نجوم الفن للحديث عن بدياتهم، والتحديات التي واجهتهم على مدار مشوارهم الفني.