هشام ماجد: "شهوتي الجزم ومراتي بتضايق من دا"

كشف الفنان هشام ماجد، رأيه في الأعمال الفنية الحالية، قائلًا: “بكره الأعمال اللي  بيبقى فيها نجم وكله بيخدم عليه، بحب كل الموجودين له لازمة ومهم في المشهد، وبحاول أعمل كده، وده بيدي للعمل قيمة أكبر، بيبقى فيها هات وخد”.

واستشهد هشام ماجد بفيلم الناظر، قائلًا: "يعني في الفيلم دا كلهم بيضحكوا وليهم لازمة، ومكتوب صح والمخرج شريف عرفة بيوزن الفيلم".

أسرار شخصية

وتحدث هشام ماجد عن أسراره الشخصية، خلال استضافته ببرنامج "أسرار" مع الإعلامية أميرة بدر المذاع على قناة النهار، قائلًا: "شهوتي شراء الجزم وساعات بيبقى مالهاش لازمة.. أنا وعمرو سلامة فينا الموضوع دا، عندي حوالي 60 جزمة" وحاططهم على الأرض، ومراتي بتضايق من دا"

ضيف شرف أمام فهمي

تابع هشام: بقف في المراية كتير واتأكد إني كويس، مبشوفش نفسي حلو وكتر خير اللي بيشوفني حلو، مبحبش تغيير الشكل والعمليات، إلا لو عندك عيب مضايقك أوي.

وعن علاقته بالفنان أحمد فهمي، قال "مش زعلان من أحمد فهمي عشان أعاتبه، وهو بيكلمني كتير، وأنا اللي مقصر معاه، وطالع معاه ضيف شرف في فيلم جديد، وأنا عندي فيلم في العيد، اسمه فاصل من اللحظات السعيدة".

حب الزمالك والعائلة

وعلى صعيد آخر، علق الفنان هشام ماجد على أقاويل أمير مرتضى منصور بشأن صفقات الزمالك، قائلًا: "أمير بيهزر وأحمد مدبولي أنا قولت له كويس، لكن الصفقات مبتتعملش كدا، وفي الفترة دي جابوا لاعيبة كويسة، عبدالله السعيد لاعب كويس وكان ناقص الزمالك، وبحب فتوح وزيزو والمثلوثي".

وقال ماجد: "نفسي أشوف عبد المنعم في الزمالك ومروان عطية وعلي معلول وإمام عاشور والشناوي، بشجع الزمالك وبحترم الأهلي، وبحب اتفرج على مدحت شلبي ورضا عبدالعال وميدو وشوبير وابراهيم فايق وعبد الجواد، بحب السينما والكورة لكن مبفهمش في السياسة، واكتر حاجة بحبها بناتي وعيلتي، وبعدهم شغلي".

برنامج "أسرار" 

برنامج "أسرار" تقدمه الإعلامية أميرة بدر على شاشة النهار يوميًا خلال شهر رمضان، في الساعة التاسعة والنصف مساءً، تستضيف من خلاله عددًا من نجوم الفن والرياضة والسياسة في مصر.