تحول من مقرئ إلى مغنٍ.. طارق فؤاد يكشف سبب خلافه مع مدحت صالح

كشف المطرب طارق فؤاد عن النصيحة التي أسداها للفنان مدحت صالح، عندما أخبره بأنه يتمنى أن يتحول من مقرئ إلى مغنٍ.

وقال طارق فؤاد في حواره مع الإعلامية بسمة وهبة مقدمة برنامج "العرافة"، والذي يعرض عبر قناتي "المحور" و"النهار"عقب أذان المغرب مباشرة، "مدحت صالح جالي مشوش، عشان أقوله الكلمة اللي هتريح باله، كده كده كان هيغني، قلت له اوعى تقرأ قرآن وأنت دماغك مركزة في حتة تانية خالص".

وأضاف: "قلت له القرآن عايز فهم وحب، ولم أكن سببا في تحوله من مقرئ إلى مطرب أكيد، جالي في توقيت كان شبه مشوش، وكنت وقتها فنيا سبقته مع عماد عبد الحليم في المعهد العالي للموسيقى العربية، وكمان كنا سابقينه في المدرسة وكان بيقرأ قرآن، وكده أو كده كان هيغني بيا أو حتى من غيري".

كما علق طارق فؤاد، على ما أثير حول خلافه مع مدحت صالح بدعوى أنه لم يدعمه عقب الشهرة الواسعة، وأنه غار من نجاحه عقب تفوق الثاني عليه بمراحل عديدة.

وقال "الفنان مدحت صالح حقيقي من أحب الأصوات لقلبي، وعن المنافسة أنا محدش بينافسني خالص غيري، أنا بعيد في جزء تاني لوحدي، هو طبعا معروف، وكمان له أعمال أكتر مني بكتير، ولكن ده ميقللش مني شخصيا خالص".

وأكمل "ببقى في منتهى السعادة لما بسمع مدحت بيغني، وأنا عامله زمان أحلى لحن، لكن لما كان في استضافة برنامج أنغام قلب الحقائق وقالها كنت في المعهد مع عماد عبد الحليم، وفي آخر البرنامج سألته عني، فقال لها آه كان معانا، والله أعلم بنيته هل تجاهل ولا نسيان منه، لكن الحقيقة مدحت هو اللي كان معانا لأن عماد كان بيعدي عليّ كل يوم الصبح ونروح سوا مع بعض، معرفش نيته إيه".