طارق الدسوقي ينتقد محمد سامي: "بيقلد الأفلام الهندي"

كشف الفنان طارق الدسوقي، سبب رفضه المشاركة في مسلسل “جعفر العمدة” بطولة الفنان محمد رمضان، الذي عرض في السباق الرمضاني الماضي وحقق نجاحا كبيرا.

وقال الدسوقي، خلال لقائه مع الإعلامية إنجي هشام، في برنامج "المنسي" المذاع عبر شاشة قناة "هي": “اتعرض عليا مسلسل جعفر ورفضته لأن في مدرسة دلوقتي عند كتير من المخرجين أساميهم كبيرة وكل سنة ليهم مسلسل وبيكسر الدنيا، لكن محمد سامي وجهة نظره ومدرسته أنهم بيعملوا الفن لتسلية الناس ومحدش يتكلم عن الرسائل والأهداف، والفن أبسط من كده كتير”.

وتابع: “اجهد نفسك شوية علشان تحقق المعادلة الصعبة، متستسهلش علشان تجيب تيمة حراقة زي ما بيقولوا، تيمة الانتقام دي معمولة من أيام أمير الدهاء ودائرة الانتقام وحصاد الشر وسعد اليتيم، إن البطل بيتداس في الحلقات الأولى وبعدين ينتقم ويصفي حساباته مع باقي الأبطال”.

تقليد الأفلام الهندي 

وأضاف “إن حد يتوه وحد يموت قبل ما نعرف السر دي خلطة بسيطة جدًا والأفلام الهندي قامت على كل ده من زمان، اعمل كل ده، لكن حط قضية نناقشها”.

وختم الدسوقي، “أنا معنديش مشكلة اشتغل مع محمد سامي ومحمد رمضان، ولكن المهم نكون هنقول إيه، ومحمد سامي قال في البروفة أنه بيسلي الناس ويقعدهم قدام الشاشة، وهو زكي وبيعرف يعمل ده، وأنا مش ممكن أعمل عمل فيه قيمة إيجابية واحدة، وفي لجان إلكترونية على السوشيال ميديا وبتشتم اللي بينتقد”.