الطيب يهاجم قناة الأهلي: لكم دينكم ولي دين

علق المعلق الرياضي أحمد الطيب على رفض جمهور النادي الأهلي تعليقه على المباريات المقبلة، وعن سر رفضه آراء قناة النادي الأهلي. 

وقال الطيب خلال استضافته مع الإعلامية بسمة وهبة ببرنامج “العرافة” عبر شاشة قناة “المحور”: "هنعتبر إنهم قالوا ونفذوا، وهو حصل فعلا، قبل كده كان المعلق الكبير الراحل الله يرحمه محمود بكر بيعلق في قناة النادي الأهلي على مباريات النادي الأهلي، ولما قال كلمتين في النص على ملعب النادي الأهلي أنه بطيء، النادي خلى الراجل العظيم القامة محمود بكر داه برة النادي، فإذا مكنتش مع النادي الأهلي في الحلو والوحش ايه هيحصل".

وعلق على أداء قناة الأهلي قائلا: مش مطلوب تبدي رأيك وأوامرك في حاجة مش بتاعتك، احنا بنقدم حاجة، ونوجه الجمهور في الصح والأصح، لمصلحة الوطن".

وأضاف: "أنا دوري مش بس أوجه الجمهور، دوري إني أثقف الجمهور، وأنت عايز تمشي معايا في السكة دي والطريق معايا اقتنع، مش عايز لكم دينكم ولي دين".

وتابع: "عندك قناة خاصة بيك استمتع بيها وقول اللي أنت عايزه، لكن بلاش تفرض رأيك على غيرك، خصوصا لما ميكنش في لفظ خارج ولا إساءة للنادي وكيانه، ولا تقليل من شأن مسؤول، ولا للاعب وموهبته، طلما مفيش الكلام دا يبقى انطلق اتفضل، ولا حد يعطلك، ولو حد عايز يعطلك هو الغلطان".

انفعال أحمد الطيب

وانزعج المعلق الرياضي أحمد الطيب على تحكيم الاعلامية بسمة وهبة الجمهور على تصريحاته، وعلق قائلا: "مين  اللي حكم ومفيش بعده كلام؟ جمهور مين اللي يحكم؟ مش كل الجمهور، احنا فاهمين غلط، إنتِ هنا موجودة في المكان دا ومكانتك دي دلوقتي، علشان تسمعي كلام الجمهور وتمشي وراه؟ التثقيف والتوجيه كاعلامي يهمني جدا يوجه الجمهور، اللي أنا اصلا عارفه بناء على ثقافتي أنا، وبناء على قواعد العمل الإعلامي، لكن أنا مينفعش أمرجح الجمهور، أبقى غلطان".