مجدي الجلاد: "دعيت على اللى ظلمنتي.. وشفتها بتتحقق"

رجح الكاتب الصحفي مجدي الجلاد أن يكون سبب اختفائه عن الساحة الإعلامية بأن “الناس بتصدقه”، وقال: “سر الاختفاء ممكن يكون عشان الناس بتصدقني، مسألة الاختفاء سؤال دائم وفي ناس بتسألني في الشارع”.

وأضاف الجلاد خلال استضافته مع الإعلامية أميرة بدر ببرنامج "أسرار"، والذي يعرض عبر شاشة قناة “النهار”: "يبدو إن فيه اتفاق بين طرفين ان ده مش وقت مجدي الجلاد يتكلم، وأنا سعيد بده، أحيانا تكون ميزتك هي اللي تمنعك، أراد الله إن مجدي قريب من الناس، وأغلب الناس مؤثر عندهم، وسعيد لأني متصالح مع نفسي، ومش هطلع إلا لما أقول كلمتي".

وتابع: “فيه شخص ذو نفوذ قوي جدًا في الدولة، وهو عايش لكن مش في منصبه، وحصل أن نتيجة لبعض ارائي المختلفة مع الدولة، قال بالحرف الواحد: مجدي مش هيطلع في التليفزيون تاني، وبعدها قال إني هتحبس، ووصلي الكلام ده مع الأستاذ مكرم محمد أحمد، اللي كان خايف عليّ، وقتها دعيت على هذا الشخص، لأنه كان يحاربني في شغلي وبيتي وبنتي”.

وأكمل: "قلت دعوة علمهالى أحد أهل الدين لما حكيت له، اللهم أرني فيمن ظلمني آية إن كان قد ظلمني، وسبحان الله أحمدك يا رب، الدعوة اتحققت نصًا، وشفته بعدما أطيح به، وفرضت عليه إقامة جبرية، ولم أشمت، وبالصدفة، كأن ربنا ساقني لهذا المشوار عشان أشوفه، كنت عايز أقول إني أحد المظاليم مش المظلوم الوحيد، ومش ممكن أسامحه". 

برنامج أسرار 

برنامج "أسرار" تقدمه الإعلامية أميرة بدر على شاشة النهار يومياً خلال شهر رمضان، في الساعة التاسعة والنصف مساءً، تستضيف من خلاله عدد من نجوم الفن والرياضة والسياسة في مصر.