أقوال المتهمة بقتل شاب بالطالبية: "ضربته بالسكينة في قلبه وسلمت نفسي"

شهدت منطقة الطالبية في محافظة الجيزة، حادثا مأساويا، عندما أنهت فتاة حياة عامل بطريقة مأساوية، بعد طعنه بسكين في القلب، نتيجة مشاجرة نشبت بينهما بسبب خلاف حول أسبقية ركوب “التوك توك”.

وحصل “تليجراف مصر”، على نص التحقيقات في القضية، وجاءت أقوال المتهمة كالتالي.

وقالت: “اللي حصل أنا شغالة على عربية كارو ببيع خضار في شارع العروبة وإمبارح الجمعة الصبح قبل صلاة الجمعة حوالي الساعة 10 لقيت توك توك واقف قدام الصيدلية فندهت على السواق اللي معاه التوك توك عشان يوصلني بيتي اللي في شارع عامر عشان أروح أغير هدومي في السكن بتاعنا”.

وأضافت: “لقيت مرة واحدة اتنين شباب دخلوا جوه التوك توك وركبوا وقالوا للسواق اتحرك، راح السواق رد عليهم قلهم أنا معايا ناس رحت أنا رايحة عليهم واحد من الاتنين اللي ركبوا في التوك توك قال لسواق التوك توك دي بت شمال وشتمني بلفظ وحش وقالوا هي أجدع مننا ولا إيه روحت أنا رديت عليه بنفس الشتيمة راح ضربني بالرجل في رجلي روحت موطية وقلعت الشبشب من رجلي ومسكته في إيدي وكنت عايزة أضربه بي على وشه راح واخده من أيدي وضربني بيه على راسي”.

وتابعت: “اللي كان راكب معاه التوك توك قالوا عورها ياض وكان سواق التوك توك واقف بيحوش وكان في شخص تاني ماشي في الشارع بيحوش بنا وأنا كنت بصوت ومش لاقية حد ينجدني منه وفلت منهم وروحت على فرشت الخضار بتاعتي وجبت السكينة الصغيرة اللي بقطع بيها الخضار”.

وأكملت: “رجعتله تاني وأول لما دخلت عليه طلع مطواة من جنبه وإحنا الاتنين كنا بنحاول نضرب بعض والناس كانت بتحاول تحوش بنا وأنا كنت خايفة ليعورني وكنا وقتها بنجري ورا بعض قدام محل كهربائي بتاع واحد اسمه عبده القط روحت ضرباه بالسكينة في قلبه وسحبت السكينة تاني راح هو طلع يجري ورايا وساعتها أنا اتكعبلت وهو وقع ورايا وراح صاحبه جاي وشاله من على الأرض ووقف توك توك تاني وركب جنبه”.

وواصلت: “وبعدها على طول رجعت عند فرشتي ودخلت العربية الكرو اللي عليها الخضار في الجراج في الشارع وكنت مروحة على البيت لقيت الناس في الشارع بتقولي المباحث بتدور عليكي رحت راحة على قسم الطالبية بنفسي وسألوني على اللي حصل وقولتلهم على اللي حصل وسألوني على السكينة قولتلهم السكينة على فرشه الخضار وحد من المباحث راح جابها وجابوني النهاردة على هنا وهو ده كل اللي حصل”.

كان مدير الإدارة العامة للمباحث، اللواء محمد الشرقاوي، تلقى إخطارًا من مدير الشرطة الجنائية، اللواء هاني شعراوي، يفيد بوقوع حادث قتل لعامل يبلغ من العمر 25 عامًا، حيث تم طعنه بسكين في الصدر بواسطة بائعة خضار تبلغ من العمر 20 عامًا، نتيجة لخلاف بسبب مناوشة حول أولوية ركوب "التوك توك"، وتم القبض على المتهمة ونقل جثة المتوفى إلى المشرحة.