اشتغل 16 ساعة ولا تتزوج.. رائد أعمال يثير الجدل بنصائح "سن العشرين"

حالة من الجدل أثارها رائد الأعمال الشاب صلاح أبو المجد، بسبب منشور له على صفحته الرسمية عبر "فيسبوك"، حول استثمار الوقت والجهد خلال فترة العشرينيات.

نصائح لسن العشرين

تباينت ردود الأفعال حول المنشور، ففريق تلقاه بسخرية وآخرون تفاعلوا معه بشكل إيجابي.

وجه أبو المجد في منشوره عدة نصائح للشباب في سن العشرين قائلًا، “لا بد أن يعمل الشاب 16 ساعة يوميًا كحد أدنى، وأرجع ذلك إلى كمال الصحة والعطاء في هذه المرحلة”.

احترام الطبقة الاجتماعية

أكد أبو المجد ضرورة احترام الطبقة الاجتماعية بقوله، "احترم طبقتك وبلاش تقول كلام طبقة غيرك"، والابتعاد عن ترديد الكلمات المعتادة لدى الطبقات الأعلى مفسرا "طالما ابوك مش مليونير يبقى ركز في شغلك وبس".

أوضح رائد الأعمال أنه ليس مستحبًا بدء المسيرة المهنية بمشاريع خاصة، وعدم اللهث وراء المناصب، "الـCEO مش نهاية العالم".

تأجيل الزواج

نصح أيضًا بتأجيل الزواج في مرحلة العشرينيات، قائلًا، "الجواز بدري عادة بيعطل، ودايما بيحطك في حالة صراع من أجل البقاء، وبيقل قدرتك على المجازفة".

طالب أبو المجد الشباب بإغلاق مواقع التواصل الاجتماعي، قائلًا، "اقفل الإنستجرام بتاعك لمصلحتك".

أكد ضرورة إتقان اللغة الثانية "الإنجليزية"، على أن يكون مستوى إتقانها أفضل من إتقان اللغة العربية.
ونصح الشباب بترك وظائفهم في الأقاليم، "لو عايش في الأقاليم اشتغل سنتين تلاتة بالكتير وبعدها سيبها وروح القاهرة".

الذكاء الاصطناعي

تطرق أبو المجد إلى استخدام تقنيات الذكاء الاصطناعي قائلًا، "الشات جي بي تي.. بقي زي القراءة والكتابة، مش اوبشن إنك ما تعرفش تشتغل بيه وعليه".

وعن العمل في الدول الخليجية، أكد رائد الأعمال ضرورة العمل قبل السفر مدة لا تقل عن سنتين في القاهرة، قائلًا، "القاهرة مفرمة ومدرسة اللي يسلك فيها يسلك في أي حتة في العالم".

تعلم مهارات جديدة

أشار إلى ضرورة تعلم مهارات جديدة ودورات تعليمية، وتأجيل فكرة الادخار والاستثمار، قائلًا، "إياك والتحويش أو الادخار أو الاستثمار في السن دا.. في أي حاجة غير كورسات عملية تطبيقية".

يرى أبو المجد عدم جدوى الحصول على درجة ماجيستير إدارة الأعمال MBA في بداية الحياة المهنية، “ لو مش مطلوبة عشان ترقية محددة يبقى ما تضيعش وقتك فيها في العشرينات”، على أن ينصب التركيز على الدورات التدريبية السريعة التي تقل مدته تحصيلها عن 30 يومًا، على أن يكون المتخصص ممارسًا لمجال تخصصه "يكون اللي بيدي الكورس ممارس للشيء بايده".

الحماس ممنوع

أكد رائد الأعمال المثير للجدل، ضرورة حضور الفعاليات التي تخص مجال العمل بصورة مكثفة، قائلًا، "بلاش حماس وبلاش تصدق كل اللي بيتقال، انت رايح من أجل التغذية السمعية والبصرية والعقلية".

وعن الأزمة التي تواجه الشباب في بداية اختلاطهم بسوق العمل، قال أبو المجد إن الأفضل أن يختار الشخص جهة العمل التي تمنحه خبرة كبيرة، قائلًموضحاا، "في المعادلة بتاعة مرتب ولا خبرة.. دايما اختار الشغل اللي هيديك خبرة أعلى".

ممارسة الرياضة

شدد على ممارسة الرياضة، "مرواحك الجيم مش رفاهية، دا أهم من الأكل والشرب.. راس مالك هو صحتك وصفاء ذهنك".

أشار إلى ضرورة الابتعاد عن الأصدقاء والأصحاب خلال تلك الفترة، مع زيادة نطاق المعارف بصورة عامة، " قلل أصحاب، وزود معارف، نصيحة تقيلة بس صدقني أكتر ناس هتعطلك في الفترة دي هم أصحابك".

تخبط كبير

أضاف أبو المجد في منشوره، أن فترة العشرينيات تشهد تخبطًا واضحًا، قائلًا، "تقبل أن العشرينات اتعملت عشان تلوش فيها، مفيش حد في العشرينات بيبقى عارف هو عايز إيه".

نصح أيضًا بضرورة التجربة في تلك المرحلة، فضلًا عن المجازفة، "جرب كتير.. افشل كتير.. جازف براحتك.. تلاقي التلاتينات رايقة".

اختتم منشوره قائلًا، "ما تسمعش من أي حد ما وصلش للي انت عايز توصل له.. فلتر الكلام، ده يعني ملخص ملاحظاتي بعد عشرين سنة أغلب شغلي مع ناس في سن العشرينات."

تعليقات المتابعون

استقبل المتابعون المنشور المتداول بردود أفعال متباينة، ففريق اتفق مع أبو المجد في رؤياه لاستثمار فترة العشرينيات، فيما اعترض البعض على طرحه واصفين إياه بـ " منفصل عن الواقع".

حياة غير عادية

دون حساب باسم مينا سمير، تعليقًا على منشور أبو المجد، قائلًا، "أكتر بوست حبيته، هو ليه اللي بيقول الواقع والحقيقة الناس بتسف وتتريق مع إني عارف ليه".

أضاف، "محدش قادر يواجه فكرة إن الحياة اتغيرت ومحتاج تشتغل بإيدك وأسنانك، Work hard and smart work work work، بس كل دا لو أنت عايز حياة مش عادية وتبقي مميز".

انتقادات لاذعة

فيما انتقد حساب باسم "الأستاذ أحمد صابر"، المنشور المتداول لرائد الأعمال صلاح أبو المجد.

ودون مشورًا قال فيه، "أستاذ صلاح أبو المجد عاوزنى اشتغل 16 ساعة، وليكن شغل من 8 الصبح أكيد هتصحى من 6، وتخلص شغلك 12 بليل ولو شغلك قريب من بيتك هترجع 1 بعد نص الليل".

شغل بعد منتصف الليل

أضاف خلال منشوره، "هو بينصحك بعدها إنك بعد ما ترجع شغلك تنزل Gym بقا علشان تأخذ بالك من صحتك وجسمك، بعد شغل 16 ساعة، فاهتروح مثلاً الـ Gym ساعة كمان يعنى كدا رجعت 2 صباحًا، وعقبال ما تأخذ دش قول وصلنا 2:30 مثلاً، يبقى كدة باقيلك 3 ساعات ونص نوم من إجمالي 24 ساعة".

تطوير الأداء

تابع، "المفترض كمان إنى أخد كورسات وأطور من ذاتي في الـ3 ساعات ونص المتبقية في يومي علشان تعرف تحقق ثروة في العشرينات، بس في الحقيقة لو يومك ماشى كدا لمدة 26 يوم، دا بافتراض إنك بتأخذ يوم إجازة في الأسبوع، فانت في أوائل التلاتينات غالبا مش هتقدر تمشى على حيلك أصلا".