"ادمرت نفسيًا".. لاعب الاتحاد السكندري يثير الجدل برسالة نارية

وجه لاعب الفريق الأول لكرة القدم بنادي الاتحاد السكندري، فوزي الحناوي، رسالة نارية لبعض الجماهير والمسؤولين، بعد رحيله عن الفريق السكندري في الانتقالات الصيفية.

وقال فوزي الحناوي، عبر صفحته الرسمية على فيسبوك: “معرفش الكلام ده هيضيع مستقبلي في الكورة ولا لا بعد النهارده، بس لازم أبرأ نفسي من كل دقيقة عدت عليا السنادي قدام ربنا مستفدتش بيها ولا النادي استفاد مني بيها، أنا أول حاجة بشكر الريس محمد مصيلحي على كل حاجة حصلت منه في السنين اللي عيشتها في نادي الاتحاد، عمره ما أخر علينا جنيه ودايما شايل النادي على كتفه”.

رسالة فوزي الحناوي

وأضاف: "بشكر جمهور الاتحاد اللي كان بيحبني واللي كان بيشتم فيا، الكوره مش دايما حلوة ومش دايما وحشة بس فيه كواليس مفيش حد بيعشها إلا اللاعيبه فقط حتى مبتوصلش للإدارة، أنا واحد مخدتش فرصتي كاملة عشان تحكم عليا أنا واحد لما خدت فرصتي وبقيت ألعب كان بيتطلب مني حاجات معينة من المدير الفني بنفذها وده بيضرني كواحد مهاجم وأرقامه قليلة".

وتابع: "لعبت في مراكز كتير في ماتشات كتير مش مركزي ولكن أنا كنت تحت أمر النادي واي مدير فني محترم كان ماسكني وشاركت معاه أنا من أربع سنين لما كنت فريي وببلاش أنا اللي جيت نادي الاتحاد جيت عشان بحب النادي واختارته من قلبي وانا مسامح اي حد اذاني او غلط فيا من جمهور النادي لان دايما خوفه علي النادي فا ده طبيعي عشان مش طول الموسم هيشجع ولا طول الموسم هينتقد هي دي الكورة فا دايمآ جمهور الإتحاد علي راسي مهما حصل من صغر واحد لأكبر واحد".

وواصل لاعب الاتحاد السكندري حديثه: "أنا عمري ما هسامح أي شخص أذاني الموسم ده أنا اتأذيت من كل حاجة أنا نفسيًا اتدمرت أنا من أول الموسم لما (شخصًا ما) قعد معايا عشان أنزل من عقدي وأنا رفضت عشان ده اللي اتفقت عليه من أول الموسم، ومن يوم ما رفضت وأنا الدنيا اتقلبت عليا من المدير الفني والأستاذ (إ.ج ) وقالي بالحرف اليوم ده وربنا الوحيد اللي يشهد على كل حرف أقوله".

وأردف: "قالي إن النادي عايز ينزل من عقود لاعيبه عشان بينزل بسقف الرواتب ردي عليه كان أنا عقدي مش كبير بس أنا موافق وتحت أمر النادي بس لما تبدأ باللي عقدهم كبير وفيه أرقام كبيرة وده طبعا ربنا يزيدهم ده رزقهم ومش هقول أرقام لأن دول إخواتي وفلوسهم هي فلوسي".

وأكمل: “قالي طيب فكر في الموضوع ولو رفضت يبقى الكلام ده بيني وبينك وكننا مقعدناش.. ده غير اللي عرفته في حوار 5%؜ بس ده مقدرش أتكلم عنه عشان ميكونش فيه أذى ليا، والكلام ده كله الإدارة معندهاش علم بيه”.

واستطرد قائلا: “الكلام ده في فترة الإعداد أنا من بعد اليوم ده وأنا بتدمر وملعبنيش دقيقة واحدة ولا خدت فرصتي مع إن في التمرين كنت بموت نفسي واللاعيبه كلها شاهدة وجزء من الجهاز شاهد وكان شايف.. ده غير إنه كان بيمرني ورا الجون لوحدي ومكنتش بفتح بوقي ولا بتكلم، وعشان حق ربنا وأكون قولت اللي ليا واللي عليا”.

وتابع: "أنا في آخر الدور الأول كده كان عندنا ماتش مع بيراميدز كنت في الاسكور وسافرت القاهرة وفرحت خلاص قربت أشارك مابولولو اتصاب، فجاب لاعب من الناشئين يوم الماتش على الاستاد، ومن غير أي سبب طلعني بره الاسكور، مع إن كان واخد ٢ لاعبيه زياده عشان لو حد اتصاب فا أنا غصب عني عشان أنا بني ادم زعلت وقولت حسبي الله ونعم الوكيل في كل ظالم والكلام وصله ولما صدق يلاقيلي غلطه بس أنا مغلطتش أنا بدعي ربنا للي ظالمني لو هوا ظالم".

وقال: "أنا لاعب متربي في النادي الأهلي ومنتخبات المراحل بتاعتي كلها كنت متواجد فيها وشاركت فيها أنا مش لاعب وحش الحمدلله رب العالمين أنا عندي موهبة وبحمد ربنا كل دقيقة عليها ولكن الشخص ده عمره ما حب أي موهبة بس أنا مش طالع أعلق شماعة ولا أتحجج بحاجة بس، أنا واحد اتظلم الموسم كله، وأنا مستاهلش كده مستاهلش كده، عشان بتمرن كويس وبحترم الصغير قبل الكبير وعمري ما عملت مشكلة".

وأتم فوزي الحناوي حديثه قائلًا: "أنا طبيعي أطلع أبرأ نفسي من موسم صفري بالنسبالي عشان أنا في نادي جماهيري وده آخر موسم ليا مينفعش أسيبهم وفيه حاجة شايلنها جواهم وحشه من ناحيتي، أنا لاعب حر دلوقتي وأتمنى ربنا يوفقني وأمضي لنادي كويس أقدر أساعده ويساعدني، أنا آسف إني طولت بس كان لازم أقول بعض الحاجات اللي حصلت معايا عشان أنا كنت بتمرن ومصحف ربنا والدمعة في عيني".