مصر ضد بوتسوانا| حسام حسن يكشف سر عدم مشاركة عواد والمهدي سليمان

تحدث حسام حسن، المدير الفني للمنتخب الوطني، عن غياب ثنائي حراسة مرمى الفراعنة، محمد عواد والمهدي سليمان، عن المشاركة ضد بوتسوانا، في المباراة التي احتضنها ستاد الدفاع الجوي، وانتهت بنتيجة 1/1، ضمن التصفيات المؤهلة لنهائيات كأس أمم أفريقيا 2025.

وقال العميد في المؤتمر الصحفي عقب مباراة بوتسوانا: “لو كانت النتيجة كويسة في الشوط الأول كنت سأدفع بمحمد عواد والمهدي سليمان في الشوط الثاني، والأهم أننا لم نخسر في مشوارنا بالتصفيات”.

تأهل منتخب مصر

وتابع: “ليه بنقلل من نجاحاتنا؟.. بنشوف الفرق المصرية الجمهور بيقول عنها دول بيلعبوا في مجموعة قوية وتلاقي المجموعة فيها مثلا الجيش الرواندي وسيمبا وفريق أبو سليم الليبي”.

وأكمل: “احنا صعدنا أول من اصعب مجموعة في التصفيات عمركم شوفتوا الجمهور غاب عن مباريات المنتخب؟ اللي حصل ده بفعل فاعل، عشان الإعلام بيقلل من المنافسين اللي بيلاعبوا مصر”.

وأضاف: “الأيام اللي فاتت، كان الإعلام بيتكلم عن منتخبات الشباب والناشئين، والأهلي هيلاعب الاتحاد، والزمالك هيلاعب المصري”.

غلق ستاد القاهرة

واسترسل: “إزاي ستاد القاهرة يتقفل؟ ماحدش سألنا عن رأينا في موضوع غلق الاستاد، أرضية ستاد الدفاع الجوي سيئة جدًا وده أثر علينا وعلى اللاعبين، كنت بعاني في الأيام الأخيرة في التدريب على أرضية الدفاع الجوي، أرضية سيئة جدًا، أنا مش بحب ألعب غير على ستاد القاهرة، أنا مش بلعب غير كام ماتش في السنة بس”.

وأتم العميد: “كنا عاوزين نلعب ماتشات المنتخب في المحلة والإسماعيلية علشان الجمهور بتاع المحافظات من حقه يشوفنا ولكن اكتشفنا إن ملعب المحلة خارج الملاعب الدولية لدى فيفا وبطولة الشباب بتتلعب في الإسماعيلية”.

ترتيب مجموعة مصر في التصفيات المؤهلة لبطولة أمم أفريقيا

1- مصر 14 نقطة

2- بوتسوانا 8 نقاط

3- موريتانيا 7 نقاط

4- كاب فيردي 4 نقاط.