"البيبي سيتر تاكل برا".. منتج فني يكشف تفاصيل أزمة طبقية بنادٍ كبير

كشف المنتج هشام سليمان، تفاصيل واقعة حدثت معه برفقة أسرته داخل نادي الجزيرة فرع مدينة السادس من أكتوبر. 
وقال سليمان عبر حسابه على "فيسبوك": "النهاردة في مطعم نادي الجزيرة 6 أكتوبر الرئيسي ومعايا العيلة، مراتي وبنتي وجوزها ومالك ابني وأحفادي، والبيبي سيتر لارا، دخل علينا المتر وقالنا ممنوع البيبي سيتر تاكل في المطعم ممكن تاكل برا".
أضاف: "قولتله حضرتك بتقول إيه، دي هتقعد على نفس ترابيزتنا وهتاكل نفس أكلنا، قالي لا والله يا فندم دي تعليمات، ضحكنا وخرجنا وقررنا مناكلش في النادي". 

مشينا ليه يا جدو؟

استكمل المنتج: "لما خرجنا سليم حفيدي سألني إحنا مشينا ليه يا جدو، أنا كنت عايز أكل، دماغي وقفت ومعرفتش أقوله إيه، مينفعش أقوله علشان لارا تاكل معانا مش هيفهم". 

أفلام شهيرة

يُشار إلى أن المنتج هشام سليمان، قدم للسينما المصرية مجموعة كبيرة من أبرز الأفلام الشهيرة، خاصة مع مطلع الألفية الحالية، وأنتج أفلام "طير إنت"، و"إتش دبور"، وظهر كمنتج منفذ لأفلام "ظرف طارق"، و"زكي شان"، و"تيتو"، و"الباشا تلميذ".
كما عمل مديرًا للإنتاج لمجموعة كبيرة من الأفلام الشهيرة في فترة التسعينات وبداية الألفية، من بينها "الآخر"، و"سكوت ح نصور"، و"المصير"، والمهاجر"، و"الهجامة"، و"المواطن مصري"، و"الهروب".