وفاء قمر: محمد رمضان صديقي.. وعبلة كامل "ست مدرسة"

أكدت وفاء قمر أنها علاقة صداقة جمعتها بالفنان محمد رمضان منذ عملهما سويا في فيلم "عبده موتة"، وأنه هو الذي اقترح عليها المشاركة في مسلسل “ابن حلال”، بينما كان لا يزال قيد التجهيزات الأولية.

وقالت وفاء، خلال  لقائها مع الإعلامية إنجي هشام، في برنامج "المنسي" المذاع عبر شاشة قناة “هي”: محمد رمضان كلمني بعد عبده موتة وقالي أنه بيعمل مسلسل والشركة بتعمل كاستينج ولو حابة تشاركي شوفي، يمكن ربنا يوفقك".

وتابعت: محمد رمضان ذكي جدا وعارف هو بيعمل إيه من أول ما بدأ لغاية دلوقتي، وأنا دايمًا على تواصل معاه ولو فيه دور مناسب ليا، أكيد هيرشحني.

وعلى الصعيد الآخر تحدثت الفنانة وفاء قمر، عن تعاونها مع الفنانة عبلة كامل، قائلة: “دي ست عظيمة ومدرسة، أنا كنت قاعدة في كواليس سلسال الدم بتعلم منها كل حاجة في الحياة، وهي ست مبتفوتش أي حاجة ولا موقف، وكانت طول الوقت بتعمل عزومات في التصوير، وأنا كنت بروح بس علشان اتفرج واتعلم منها حتى لو معنديش تصوير، وأنا مبسوطة جدا أني اشتغلت مع الأستاذة عبلة كامل”.

وأضافت وفاء قمر أنها مازالت على تواصل مع الفنانة عبلة كامل في المناسبات، وأي فنان أنا اشتغلت معاه بنكون على تواصل في المناسبات.

وعن مصدر دخلها بعد ابتعادها عن الوسط الفني لمدة عام، علقت وفاء قمر: أنا عندي بيزنس تاني خالص بعيد عن الفن ومش معتمدة على الفن ماديًا.

وعلقت على ظاهرة اتجاه الفنانين إلى السوشيال ميديا وبالتحديد موقع تيك توك، بعد ابتعادهم عن الساحة الفنية، قائلة: الموضوع حرية شخصية وكل واحد له أسبابه، أنا مقدرش أنتقد حد، وأقول ده صح وده غلط، ممكن كل واحدة له أسبابه في أنه يطلع لايف علشان الناس متنساهوش أو يستنى هدايا أو يبقى فيه عائد، كل واحد له ظروفه.

وأضافت: أنا لو فكرت أعمل ده هعمله علشان يكون ليا تواصل مع الجمهور أو صحابي لأني بتفاجئ بيهم ومنعرفش حاجة عن بعض من زمان، وبلاقيهم على لايف أو فيديو.

وعن دور النقابة في تشغيل الفنانيين: دكتور أشرف زكي مبيتأخرش على حد، ومفيش مشكلة أن الفنان يستغيث بنقابته احسن ما يستغيث على لايف، وأنا شايفة أن الفنان قدوة للناس حتى لو عنده مشاكل.

درست وفاء قمر  في معهد فنون مسرحية، وأول عمل لها  كان في “ الحرافيش” مع كمال أبو رية ووفاء عامر، وتزوجت من الفنان هيثم محمد زواج لـ5سنوات، قبل أن ينفصلا عام 2022.