جدو لـ أحمد سليمان: "أنتوا اللي عليكم علامات استفهام لهذه الأسباب"

رد المدرب العام لفريق بيراميدز محمد ناجي جدو، على تصريحات أحمد سليمان عضو مجلس إدارة نادي الزمالك، والتي أشار فيها إلى تعنت إدارة السماوي في بيع لاعبيها إلى الزمالك.

كتب جدو عبر حسابه الشخصي على موقع “إكس”: “الكابتن أحمد سليمان طلع امبارح وهاجم بيراميدز وأندية الشركات وقال علامات استفهام على بيراميدز، عشان مش بيدوهم لاعيبة وإنهم بيشتروا لاعيبة وأنهم بيصرفوا كتير، وبيدخلهم فلوس قليلة ومش بيسيبوا لاعيبة تحترف”.

وأضاف: “أولًا بيراميدز أداهم عمر جابر ودونجا وعبدالله السعيد وهما دلوقتي أحسن لاعيبة في الزمالك، وهل لو بيراميدز كلم الزمالك إنهم عايزين زيزو مثلا الزمالك هيوافق؟، ومسيبتش زيزو يحترف ليه؟”.

وواصل جدو تصريحاته: “ثانيًا طبيعي إن بيراميدز يشتري لاعيبه ويقوي القائمة زي كل الفرق”.

وتابع: “ثالثًا، ممكن تقولنا يا كابتن أحمد، الزمالك بيصرف كام؟ وبيدخله كام؟ وهل بيكسبوا فلوس من الكرة؟ أكيد لأ”.

واستطرد: “الزمالك دفع أكتر من مليار جنيه غرامات بس، فممكن تقولنا الكرة في الزمالك بتكسب كام؟”.

وأضاف: “رابعًا، من أول المجلس نجح في الانتخابات وكل لقاء تليفزيوني من أول الرئيس لأصغر عضو بيتكلم عن رمضان، وعايزين رمضان صبحي مع إنه متعاقد مع النادي لمده 3 سنوات”.

واختتم جدو تصريحاته: “دي حاجة عمري ما شوفتها في أي حتة في العالم، لا في مصر ولا بره مصر إن مسئولين نادي بيتكلموا عن لاعب في نادي تاني، وعقده سارٍ لمدة 3 سنوات، بصراحة أنتوا اللي عليكم علامات استفهام”.