عادل عوض: علي رضا كان "غاوي رقص"

نظم معرض القاهرة الدولي للكتاب في دورته الـ55 ندوة احتفاء بمئوية ميلاد الفنان علي رضا، مؤسس فرقة رضا، بحضور زوجته الفنانة الكبيرة فريدة فهمي، والمخرج عادل عوض، ومحمد القذافي أحد أعضاء فرقة رضا.

مشوار علي رضا

وقال المخرج عادل عوض: “الراحل علي رضا كان غاوي رقص، وبيدخل مسابقات رقص، ومن أسرة فنية كبيرة، في وقت كانت فيه أماكن كثيرة للسهر، وكان يكسب تلك المسابقات، وعند سن معين أحب الإخراج وعمل كمساعد مخرج لعدد من كبار المخرجين”.

وتابع عوض: "علاقتى بالراحل علي رضا بدأت من خلال اتصالي به وبحثي عنه كثيرًا، حتى سمح لي بمقابلته واكتشفت إنه بيعزف عود وبيلحن في أول مقابلة بينا".

أول فيلم استعراضي 

وأضاف: "الأفلام اللي اتعملت قبل علي رضا، لم تكن استعراضية، وإنما غنائية، وفرقة رضا حققت إنجازات كبيرة، ولفت العالم كله، وخدت جوايز كتيرة".

وواصل عوض: “ساعات بنقول على أفلام ليلى مراد أنها استعراضية، وده غلط لأن دي أفلام غنائية، زي أستاذ فريد الأطرش، أما يجيب سامية جمال ده ليس استعراض ده جزء من ديكور، وكان أول فيلم إجازة نص السنة والمفروض المؤرخين كانوا اتكلموا عنه لكن للأسف ده محصلش”.

زوج مثالي

وقالت الفنانة فريدة فهمي، "علي رضا زوج مثالي وعظيم، وقليل نلاقي زيه في طريقة فهمه وتفكيره ومعاملته للناس، أنا بعتبره الدينامو بتاع فرقة رضا، وحط الفرقة على الطريق اللي خلاها تاخد كل الجوايز دي".

وأضافت زوجة الراحل علي رضا: "كان بيحب يقف ورا الكادر، ويشجع الفنانين، وبلاقي صعوبة في إني أتكلم عنه، أحلى أوقات حياتي قضيتها معاه".