أحمد كامل: "غبت عن الساحة لأني مش عاوز أشتغل في الساحل"

كشف المطرب أحمد كامل، عن سبب غيابه عن الساحة الفنية لأكثر من 5 سنوات.

وغاب أحمد كامل بعد إطلاق آخر أغانيه “قولي” في عام 2019.

وأكد خلال لقاء مع الإعلامي هشام السيوفي، في برنامج "رؤيا مصر" عبر منصة “يوتيوب”، أن السبب هو رفضه للغناء في الساحل الشمالي بسبب الخمور.

وقال أحمد كامل “حاليا معنديش حفلات في مصر كل إللي بيتعرض عليا في الساحل وأنا مقاطع الساحل لأني مبشتغلش في أماكن فيها ناس بتشرب ومش هاخد فلوس من الحاجات دي”.

وأضاف كامل، “وكمان بيتعرض عليا أغني في ملهى ليلي وبرفض لأني مش هغني في مكان بيتربح من الخمور مش هصرف على بيتي من الفلوس دي”.

وتابع: “أنا عارف إن في ناس هتطلع تقول طب ما الغنا حرام وكدا، لكن بالنسبالي دي قناعات وأنا مش هفتي في أمور الدين أنا أقل من كدا بكتير، وياريت لو حد ناوي يكلمني في حاجة زي دي ميكلمنيش أحسن لأني مش هرد”.

وردا على سؤال هل ممكن أن تبتعد عن الغناء، قال: “ياريت والله ودايما بقول يارب لو في خير اديني خيره ولو في شر ابعدني عنه وممكن يجي عليا وقت وأقول مش عايز أغني وده عشان أهم حاجة في الدنيا هو اللي خلق الدنيا”.

واستكمل أحمد كامل حديثه عن الحفلات وقال: “بستعد لحفلة في النمسا في شهر سبتمبر المقبل وعندي حفلة في الأردن والعراق”.

يشار إلى أن أحمد كامل، حقق نجاحا هائلا في عام 2017 بأغنية “يا ليل”، وقدم عددا من الألبومات والأغاني السينجل التي لاقت رواجا كبيرا.