قاتل زوجة شقيقه بحلوان: "اضطهدني فأردت أن أحزنه على مراته"

حصل موقع “تليجراف مصر” على نص التحقيقات مع المتهم بقتل زوجه أخيه بـ4 طعنات بسبب معايرتها له بالفشل في حي حلوان، جنوب القاهرة.

وجاءت نص التحقيقات التي أجرتها نيابة حلوان كالتالي:

(س): ما اسمك وسنك وظيفتك وعنوانك؟.
(ج): اسمي عمر صابر منصو، السن: ٢٣ سنة، أعمل “عامل أمن”، ومقيم شارع الوحدة، منطقة الملاءة، غرب الوالدة، حلوان.

(س): ما ظروف نشأتك وتفصيلات إقرارك بشأن واقعة قتلك للمجني عليها رشا كامل شوكت؟

(ج): أنا من مواليد منطقة غرب الوالدة في حلوان وأصغر واحد في اخواتي، ووالدتي متوفية ووالدي لسه عايش واتربيت في شارع ترعة الخشاب في غرب الوالدة مع اخواتي وأبويا وأمي، وفي سنة ٢٠١٤ اخواتي بنوا البيت اللي كلنا عايشين فيه دلوقتي وأنا مقيم في الدور الأرضي لوحدي وبقية اخواتي في الأدوار اللي فوق وزوجاتهم.

فقدت والدتي سنة ٢٠١٦ بعد ما عملت عملية استئصال سرطان في الثدي اتوفت بعدها علطول، وأنا كنت متعلق بوالدتي جامد وكانت بالنسبة لي كل حاجة وهي اللي كانت شيلاني وبتخدمني في عز تعبي لما عربية خبطتني وكنت راقد في البيت ومركب شرايح ومسامير وبعد موتها اتأثرت نفسياً جداً ومحدش بقى بيسأل عليا وكان اخواتى بيحسسوني دائماً من بعد موت أمي إني إنسان فاشل ومريض نفسي فابتديت أحقد وأغل على اخواتي لأني كنت مضطهد منهم.

بعدها اتجوزت من بنت خالتي في 2020 اسمها شیرین عثمان شوکت ووافقت عليا بالرغم من إن اخواتي كانوا بيقولولي مش هتوافق بيك، وبعد ما أتجوزنا ربنا كرمني وبقت حامل لكن وهي بتولد في مستشفى القصر العيني ماتت هي والجنين، ومن بعدها ما بقاش فيه أي أمل ليا في الحياة، وفي الوقت ده كنت محتاج اخواتي يقربوا مني ويطلعوني من الحالة النفسية اللي كنت فيها، لكن ملقتش ده منهم وبصراحة حقدي زاد نتيجة ظلمهم ليا وبقيت بكرههم وتحديداً رشا مرات أخويا حماده، ومن أسبوعين تقريباً كنت راجع من شغلي وداخل البيت فقبلت رشا على باب السلم الحديد كانت واقفة فلقتها بترمي عليا كلام وبتقولي والله ما هتفلح في أي حاجة، وفي الوقت ده جه في باللي فكرة إني أندمها على اليوم اللي أتولدت فيه وأخلص عليها.

(س): ما مؤهلك الدراسي تحديداً؟

(ج): أنا كنت في ثانوي صنايع ونقلت لثانوي عام منازل وخدت الشهادة. 

(س): ومع من كنت تقيم تحديداً؟

(ج): من وأنا صغير وأنا قاعد في بيت عيلة مع أخواتي رمضان ومنصور وحماده وأحمد وزوجاتهم ولما كبرت سكنت في الدور الأرضي لوحدي.
(س): ما حالتك الاجتماعية تحديداً؟
(ج): أنا كنت متجوز من بنت خالي شيرين عثمان شوكت في 21-2-2020 وربنا مرزقنيش بعيال لأنها "اتوفت وهي بتولد يوم 11-12-2020 في مستشفى القصر العيني.

(س): ما مهنتك تحديداً؟

(ج): أنا اشتغلت حاجات كتير، أول شغلانة ليا أمن في مترو الأنفاق وبعدها سبت الشغل واشتغلت في شركات أمن ثانية ومن شهر بالظبط اشتغلت في شركة حماية لخدمات الأمن اللي في القرية التكنولوجية في المعادي وده الشغل الليأنا استقريت فيه. 

(س): ما حقيقة السبب في كثرة تنقلك للعمل في شركات الأمن وعدم استقرارك في إحداها؟
(ج): علشان أصحاب الشركات ديه كانوا كل شوية بيغيروا موظفين الأمن وعشان أزمة كورونا كانوا بيصفوا الناس أو يقللوا المرتبات فعشان كده كنت بمشي.

(س): ما طبيعة الاختصاصات الوظيفية التي كانت توكل إليك إبان فترات عملك؟
(ج): كنت بفتش الشنط في المترو وبعد كدة اشتغلت أعمال إدارية في باقي شركات الأمن. 

(س): ما علاقتك تحديدا بالمدعو حماده صابر منصور؟
(ج): أخويا.

(س): ما علاقتك تحديداً بالمعني عليها رشا کامل شوکت؟
(ج): تبقى مرات اخويا و تعتبر بنت عمي بس مش لزم.

(س): هل من ثمة خلافات سابقة بينك وبين شقيقك حماده صابر منصور والمجني عليها رشا كامل شوكت؟ 

(ج): أيوة 

(س): منذ متى تحديداً نشأت تلك الخلافات؟
(ج): من سنة 2016 

(س): ما سبب نشأة تلك الخلافات؟
(ج): سببها إن حماده صابر بالذات ومراته رشا كانوا بيضطهدوني وبيحسسوني دايماً إني فاشل، ده غير إهمالهم المستمر ليا لدرجة إنهم لما كانوا بيبقوا طالعين من باب العمارة محدش كان بيخبط عليا علشان يسأل عليا وأنا عيان.  

(س): صف لنا تحديداً ماهية تلك الخلافات؟
(ج  زي ما قولت الخلافات كانت عبارة عن إن حماده وبقية إخواتي دائماً بيلوموني وبيحسسوني إني إنسان فاشل وماليش لازمة في الحياة ويسمعوني كلام يكسر النفس زي مثلاً لما طلبت إني اتجوز بنت خالي قالولي إنها مش هتقبل بيك لأنك مش مستقر في شغلانة وعندك اكتئاب ومريض نفسي وكانوا دائماً بيقولولي أنت الأوضة اللي أنت قاعد فيها ديه مزبلة، وأنت ليه مش طالع نضيف زينا وكانوا دائماً علطول فيه لوم مستمر منهم ليا واستهزاء بكلامي، وكانت رشا دائماً مقوية أخويا حمادة عليا وكانت بتحرضه على إنه يطردني من الأوضة اللي أنا عايش فيها في الدور الأرضي واشوفلي أي أوضة تانية ودخلوني بالعافية مستشفى أمراض نفسية في المعادي ولما أتجوزت وربنا كرمني أنا ومراتي الله يرحمها وحملت محدش فيهم راح معاها المستشفى ولا وقفوا جنبي لما ماتت. 

(س): ومتى وأين تحديداً تم إيداعك بإحدى مستشفيات الصحة النفسية؟

(ج): أنا مش متذكر أوي بس هما دخلوني المستشفى في سنة 2019 في آخرها تقريباً والمستشفى كانت جنب كارفور المعادي لكن مش فاكر أسمها. 

(س): وهل كنت تعانى من أي أمراض نفسية أو عصبية وقت إيداعك بالمشفى سالف الذكر؟
(ج): أنا مش مريض نفسي، كل اللي أنا بعاني منه بس سوء معاملة اخواتي ليا وده حسسني إنهم بيضطهدوني وعمل عليا ضغوط عصبية خلتني أكرهم وجالي اكتئاب بسيط لما أمي اتوفت لأني كنت متعلق بيها وإحساسي بالغربة في الدنيا من بعديها، ولما مراتي ماتت برضوا حسيت باكتئاب وإني خسرت الدنيا.

(س): ما الفترة الزمنية التي مكنثتها داخل المشفى؟
(ج): حوالي 55 يوما 

(س): وهل وقفت على التشخيص الطبي الذي شخصت به إبان فترة إيداعك بالمشفى ؟
(ج): أيوة

(س): ما ذلك التشخيص الطبي الذي وصفت به؟
(ج): كانوا بيقولولي إن أنا عندي اكتئاب 

(س): وما حقيقة معاناتك من ذلك المرض؟
(ج): أنا زي ما قولت قبل كده أنا مش مريض نفسي  

(س): ولماذا إذاً شخصت بذلك المرض؟
(ج): أخواتي هما السبب وهما اللي ادوا اعتقاد للمستشفى إن أنا مريض نفسي وأنا زي ما قولت إني بعاني بضغوط عصبية بسبب ظلم اخواتي ومراتتهم ليا. 

(س): ومتى وأين تحديداً توفت زوجتك السابقة المدعوة  شيرين عثمان شوكت؟
(ج): هي توفت 11-12-2020 في مستشفى القصر العيني. 

(س): وما حقيقة السبب في وفاة زوجتك؟
(ج): وهي بتولد الجنين اتوفى في بطنها وحصلها تسسم وماتت هي كمان 

(س): وما الذي آلت إليه تلك الخلافات التي بينك وبين أشقائك وبالأخص حماده صابر منصور وزوجته رشا كامل شوكت؟
(ج): الخلافات فضلت شغالة ما بينا وكراهيتي لحماده ومراته ابتدت تزيد يوم بعد يوم بالأخص لما مراتي ماتت وبقيت نفسياً مش مرتاح وحاسس إني مضغوط عصبياً من أي كلام يقولوه ليا سواء كان نصح أو لوم. 

(س): وما الذي بدر في ذهنك تحديداً من جراء تلك الخلافات السابقة بينك وبين شقيقك وزوجته المجني عليها رشا كامل شوكت؟ 
(ج): جه في بالي إني أخلص على رشا وأقتلها وأحزن أخويا حماده عليها زي ما هما اتشفوا فيا لما مراتي ماتت وهي بتولد.

(س): ومتى تحديداً جال بخاطرك فكرة الخلاص من المجني عليها؟
(ج): من حوالي أسبوعين. 

 (س): وما سبب وحقيقة نشأة تلك الفكرة الإجرامية في ذهنك؟

(ج): علشان رشا بسبب عمايلها وأفعالها واضطهادها ليا خلتني أبقى مضغوط عصبياً ده غير إنها كانت هي وأخويا حماده متشفين فيا لما مراتي ماتت وهي بتولد. 

كانت أجهزة الأمن بمديرية امن القاهرة تلقت في شهر مايو عام 2021، بلاغا من شرطة النجدة بوجود جثة داخل مدخل عقار بمنطقة حلوان، وبالانتقال والفحص عثر على جثة رشا كامل، ربة منزل، مصابة بـ4 طعنات بالبطن والصدر، وبعمل التحريات تبين أن وراء ارتكاب الواقعة شقيق زوجها، وضبط وجرى تحويله للنيابة العامة التي قررت إحالته للمحاكمة الجنائية، وأصدرت محكمة جنايات جنوب القاهرة حكما بالسجن المؤبد على المتهم.