انفراد بنص التحقيقات| ابن "سفاح التجمع": حبّيت رحمة أوى ومشفتهاش بعد ما "اتجننت" ويعني إيه صلاة؟ (8)

ينفرد "تليجراف مصر" بنشر النصّ الكامل لتحقيقات النيابة العامة في قضية "سفاح التجمع".

مفاجآت وأسرار صادمة كشفتها أقوال المتهم "كريم س"، التي نشرناها في حلقات سابقة، ونتابع نشرها لاحقا، إلا أن هناك طرفًا أصيلا وشاهدا مهمّا في القضية، سمع ورأى وعاين وعايش جانبًا منها، ربما لا تُؤهله حداثة سنّه، 9 سنوات، لاستيعاب مجمل التفاصيل، لذلك تشدّد النيابة العامة، مع كل سؤال على ملاحظة جانبية "أفهمناه".. إنه ابن سفاح التجمع، "زين"..

ارتبط "زين" بالضحية الثانية "رحمة"، التي أحبّها ويبدو أنها عوّضته عن حنان الأمّ، التي لم يرها منذ سنتين، كانت تشاركه ألعابه وتقضي معه أوقات فراغه، تركب معه الخيل في نزهات عديدة أظهرتها الصور التي عرضتها عليه النيابة..

أحبّ الابن "رحمة"، وعندما سأل عليها بإلحاح، أجابه والده إجابة حاسمة، تقطع الطريق على السؤال عليها مجددًا.. "اتجننت ومش هتيجي تاني"..

تفاصيل كثيرة تقرّبنا أكثر، ليس فقط من سفاح التجمع، ولكن من "زين"، ضحية أخرى لأبيه، لكنها ما زالت على قيد الحياة..

ماذا قال لك والدك عن دينك؟ وماذا تعرف عن أركان الإسلام؟ وهل اصطحبك أبوك لأداء الصلاة في المسجد؟.. أسئلة مثيرة للاهتمام وتعكس جانبا من شخصية "كريم س"، الإنسان، قبل أن يكون "سفاحًا"  لأحد تجمعاتنا المصرية الكثيرة المترامية هنا وهناك..

•  بملابس وبدون.. سفاح التجمع يعترف: صورت 300 فيديو أثناء تعذيب الضحايا

رافق "زين" ، ابن "سفاح التجمع"، جدته لأبيه خلال التحقيقات، وتلك جولة أخرى من التحقيقات، انتظروها في أقرب وقت..

وإلى نص التحقيقات مع ابن "سفاح التجمع":

س: ما اسمك وسنّك؟

ج: اسمي زين كريم، وعندي 9 سنين

س: ما هي معلوماتك بشأن الواقعة محل التحقيق؟ (أفهمناه)

ج: اللي أنا أعرفه إني كنت عايش مع بابا وماما وحصل مشاكل بينهم وبابا جه خدني وجاب لي بلاستيشن وخدني معاه، ورحت مع بابا وقعد في بورسعيد ونقلنا في القاهرة من سنتين

•  "الشيطانة التي أحبتني".. ماذا قال “سفاح التجمع” عن زوجته؟
•  "جوازاته فستك".. سفاح التجمع يكشف عدد زوجاته

"بحبّ أقعد مع نفسي"

رحت مع بابا النيابة علشان أقول المشاكل اللي بين بابا وماما، وبعد كده أنا مشفتش ماما خالص من سنتين، وقعدت مع بابا لوحدنا وروحت مدرسة (...) وبابا حياته معايا على طول ولما بيخرج بيسيبني مع نفسي وأنا بكون حابب إن أقعد مع نفسي، وبابا بيخلّص مشاويره ويرجع لي تاني، وأنا لما بكون في البيت وبابا معاه زمايله أنا بكون قاعد معاه عادي..

"بحب النوم"

ساعات بكون قاعد بلعب في اللفينج روم، وبابا بيكون معاه زمايله، وأنا بكون شايفهم عادي وبقعد معاهم عادي، وأنا دايما بنام بدري ومعرفش مين اللي بيكون مع بابا وأنا بحب النوم..

"رحمة كانت بتحب تلعب معايا"

س: هل كنت تتعامل مع أي من تلك السيدات (رحمة- لوزة- سلمى)؟ (أفهمناه)

ج: أنا كنت دايما بحب ألعب مع رحمة، وهي كانت بتحب تلعب معايا، ولوزة عملت لي مرتين بطاطس محمرة وبوب كورن، وأنا كنت بحب البطاطس المحمرة، وسلمى كان معاها البيبي بتاعها ومش بتلعب معايا خالص.

•  الضرب كان أقل حاجة بشوفها.. زوجة سفاح التجمع تكشف تفاصيل جديدة صادمة
•  زوجة سفاح التجمع: "كان هيقتلني أكتر من مرة وأمه هددتني"

"رحمة اتجننت ومش هتيجي تاني"

س: متى كانت تقطن معك المدعوة رحمة تحديدا؟ ( أفهمناه)

ج: هي كانت قاعده معانا تقريبا من شهر أو أكثر

س: ما الذي أبلغك به والدك تحديدا بشأن المدعوة رحمة؟ ( أفهمناه)

ج: هو بابا قالي إن هي اتجنّنت ومش هتيجي تاني

س: ما هو أثر ذلك الخبر عليك إذا؟ (أفهمناه)

ج: أنا كنت زعلان أوي لإني بحب ألعب معاها

س: هل خلال تواجدك رفقة والدك سكن معكم أي من السيدات الأخريات؟ (أفهمناه )

ج: لا هي رحمة بس، وقبل كده كانت ماما

س: هل أنت على علم بشخصية كل من (سلمى- لوزة - زياد- رحمة)؟ (أفهمناه)

ج: أيوة

•  لم تبلغ عامها العشرين.. "رحمة" إحدى ضحايا سفاح التجمع
•  موديل خلعت الحجاب.. قصة "رحمة" أصغر ضحايا سفاح التجمع

ملحوظات إيضاحية من النيابة العامة:

قمنا بفضّ الحرز الخاص بالهاتفين المحمولين المضبوطين مع المتهم عقب التأكد من سلامة أختامهم وصحة بياناتهم، وقمنا بفتح الهاتف المحمول ماركة آيفون 15، وبعرض بعض الصور على الطفل أقرّ أن هناك العديد من الصور تجمعه هو ووالده، وعرضنا صورة المجني عليها (رحمة)، فقرّر أن تلك الصورة لها، وكان يحبها ويلعب معها وكانت تجلس معهما في المسكن.

وأفاد لنا بأن هناك العديد من الصور التي تم التقاطها معها، وباستعراض الصور تبين وجود المتهم والد الطفل، حال ركوبه للخيل وركوب الطفل زين على خيل آخر وبخلفه إحدى السيدات، وبعرضها عليه أقرّ أنها  للمجني عليها (رحمة) وأن تلك الصورة ملتقطة لهما حال تواجده بمدينة بورسعيد على الشاطئ.

وبالرجوع إلى تاريخ تلك الصورة تبين أنها ملتقطة بتاريخ 20- 2- 2024، وباستكمال فحص الصور تبين أن هناك العديد من الصور للطفل زين برفقة إحدى السيدات، وبعرضها عليه أقرّ أنها للمجني عليها رحمة، وأنه كان في معها رفقة والده بمحافظة القاهرة.

وبفتح الهاتف المحمول الثاني وبالدلوف إليه، تبيّن وجود بعض الصور للطفل زين ووالده المتهم وآخرين، وبعرضها عليه أقرّ بأن السيدة التي تظهر بالصورة هي المجني عليها رحمة، وأن الشخص المتواجد بجوارهم هو زياد صاحب لوزة، والصورة ملتقطة بتاريخ 18- 1- 2024.

وباستكمال عرض الصور، أقرّ أن هناك صورا عديدة للمجني عليها رحمة ملتقطة في ذات اليوم وصورا أخرى للمدعو زياد، وبعرض صوره على الطفل - ملتقطة في 22- 1- 2024- من داخل مسكنه بواسطة الكاميرا المثبتة بالأعلى، وبعرضها عليه أقرّ أن التي ترتدي سويت شيرت أبيض في أسود اللون، هي المدعوة لوزة وأن المستلقاة على الأريكة هي المدعوة سلمى، شقيقة رحمة، وأن من بجوارها هو ابنها الصغير.

وأشار لنا إلى طبقين موضوعين على المنضدة بداخلهما بطاطس محمّرة وبوب كورن (فيشار) وأقر أن الذي قام بإعدادهما المدعوة لوزة، وبعرض صورة أخرى عليه أقر أن السيدتين الظاهرتين بالصورة هما لوزة ورحمة، وبرفقتهما والده المتهم.

وبعرض مقطع مرئي يظهر فيه منه سيدتان، إحدهما تقوم بإطعام طفل صغير والأخرى مستلقاة على كرسيّ يشاهدان التلفاز، قرر لنا أن تلك السيدة هي سلمى تقوم بإطعام نجلها الصغير، وأن الثانية هي المجني عليها رحمة..

"كانت حبيبة بابا وأنا كمان"

س: هل تلك الصور والمقطع المصور والذي تم عرضهما عليك هما للمدعوات ( رحمة-  لوزة- سلمى- زياد)؟ (أفهمناه)

ج: أيوة، أن عارفهم كلهم وهما أصحاب بابا، وممكن أنام كتير، وأنا معرفش مين أصدقاء بابا، ولكن أنا كنت بخرج مع رحمة ودي كانت حبيبة بابا وأنا كمان، وهي كانت فقيرة ومش معاها فلوس ومامة رحمة كانت بتعضّها، وأنا كنت بحبها أوي علشان كانت بتلعب معايا كاتش

"كانت بتنام مع بابا في أوضته"

كانت على طول بتبقى معايا في البيت، وكانت بتدخل تنام مع بابا في أوضته، وكنا بنخرج مع بعض شوية مش كتير، وكانت أختها سلمى بتيجي تقعد معاها، ومعاها بيبي صغير، وكانت في واحدة كمان بتيجي اسمها لوزة، دي حبيبة زياد، ودي كانت بتعملي بطاطس محمرة وفشار.

أنا كنت بخرج مع زياد ورحمة، وساعات لوزة كمان، خرجت معانا بس مش كتير وأنا كنت بروح المدرسة وبابا بيوديني بالعربية بتاعتنا وكنت منتظم في المدرسة وبروح الساعة 8 وأروّح الساعة 3:30 عصرًا.

"بابا كان عاوز يهرب من البوليس"

بعد كده رحمة ملقتهاش موجودة في البيت معانا، وسألت بابا عليها، قال لي هي اتجننت ومش هتيجي تاني، وبعد كده لقيت في بوليس جه دخل البيت، وبابا كان عاوز يهرب منهم من الأوضه بتاعتي بس هما مسكوه وخدوا التليفونات منه والبوليس سألني على باسورد التليفون وأنا قلتلهم أن باسورد رقمه (....) وهما كانوا عاملين دايرة حوالين بابا (...) وكلبشوه وبعد كده أنا مشفتوش تاني..

•  "كان بيدفعلهم بالدولار".. 600 فيديو إباحي لـ"سفاح التجمع" مع فتيات ليل
•  سفاح التجمع: لهذا السبب ارتديت قناعا في أثناء معاشرة الضحايا

"مدخلتش غرفة بابا"

س: هل كان والدك يقوم باصطحاب الفتيات والسيدات إلى مسكنك حال تواجدك بداخل المسكن؟ (أفهمناه)

ج: أيوة، بابا كان بيجيب معاه زمايله عادي، وأنا بكون ساعات نايم أو صاحي عادي

س: هل كانت أي من تلك الفتيات تقطن مع والدك بداخل المسكن؟ (أفهمناه)

ج: مفيش حد بيقعد معانا على طول إلا رحمة، قعدت معانا أسبوعين وكانت بتقعد معانا قبل كده

س: هل كان يقطن مع المدعوة رحمة أي من السيدات الأخريات؟ (أفهمناه)

ج: أيوة، هي كانت معاها أختها سلمى وبيبي صغير، وكان معاها ساعات لوزة صاحبة زياد

س: هل قمت بالدخول إلى غرفة والدك المتواجدة بداخل مسكنكم يوم يوم 15- 5- 2024؟ (أفهمناه)

ج: لا، أنا مدخلتش غرفة بابا

س: هل في ذلك اليوم الموافق الأربعاء قام والدك بإيصالك إلى المدرسة؟ (أفهمناه)

ج: أيوة

س: كيف وقفت على ذلك؟ (أفهمناه)

ج: لأن أنا يوم الأربعاء كان عندي ألعاب وأنا بحب اليوم ده

س: هل قام والدك بإعادتك إلى المسكن في ذات اليوم؟ (أفهمناه)

ج: أيوة

•  "ماتت في يدي".. سفاح التجمع يشرح طريقة تخلصه من إحدى ضحاياه
•  فتش عن المرأة.. كيف تحول رسام "التاتو" إلى "سفاح التجمع"؟

"مشوار شهري لـ الفارمسي"

س: هل قام والدك بمغادرة المسكن صباح يوم 26- 5- 2024 في الساعات الأولى منه؟ (أفهمناه)

ج: أيوة

س: هل أخبرك عن وجهته تحديدا؟ (أفهمناه)

ج: أيوة، هو قالي إن هو رايح للفارمسي (الصيدلية) والدكتور في بورسعيد

س: هل اعتاد والدك الذهاب إلى الفارمسي (الصيدلية) والدكتور في بورسعيد؟ (أفهمناه)

ج: هو بابا كاب بيروح مرة كل شهر أو شهرين وكان بيعرفني قبل ما يمشي

س: هل كنت تجلس بالمنزل بمفردك حال تواجده ببورسعيد؟ ( أفهمناه)

ج: أيوة

س: هل كنت تخشي على نفسك حال وجودك بمفردك؟ (أفهمناه)

ج: لا، لأن أنا عارف إن مفيش حد ممكن يدخل عليّا، وأنا بكون نايم بالليل ولما بصحي بلاقي بابا موجود

"بيعاقبني عقاب بسيط أوي"

س: هل كان والدك يعاملك بطريقة حسنة أم يعسّفك في الحديث أو المعاملة؟ (أفهمناه)

ج: هو كان بيعاملني كويس جدا وأنا كنت بحبه

س: ألم يقم والدك بالتعدي عليك بالضرب أو نهرك إن لم تطع أمره؟ (أفهمناه)

ج: لا، هو بيعاقبني عقاب بسيط أوي وساعات ممكن يضرب بإيده بالراحة على دماغي أو يدخلّني الأوضة ويقعّدني جوه شوية

"لما بآخد معاه شور معاه بس"

س: هل يصدر والدك لك الأوامر بعدم الخروج من الغرفة إلا عقب أن تقوم بالنداء عليه في حالة وجود أصدقاء معه بالمسكن أو بالغرفة الخاصة؟ (أفهمناه)

ج: أيوة، هو بيقولي لو هخرج من الغرفة أنده عليه، وأنا فعلا قبل ما أخرج من الغرفة بنده على بابا، وبالذات لو أنا كنت بالليل، لو الصبح ممكن أطلع عادي

س: هل شاهدت والدك حال تجرّده من ملابسه وتواجده رفقة أي من الأشخاص الآخرين أو السيدات وهو على تلك الحالة؟ (أفهمناه)

ج: لا، أنا عمري ما شفت بابا كده غير لما أكون بآخد معاه شور (حمام)

س: هل هناك أي من السيدات الأخريات كانوا يتردّدون على والدك؟ (أفهمناه)

ج: اللي كان بيجي لبابا هما رحمة ولوزة وسلمى واللي كانت بتبات مع بابا هي رحمة، ومشفتش بنات تانية بتيجي لبابا البيت

س: ما هو ميعاد نومك اليومي؟ (أفهمناه)

ج: أنا بنام من 12 لحدّ الساعة 8 الصبح، وفي أيام الإجازة بنام من 12 بالليل لحد 2 الظهر

•  اعتراف صادم لسفاح التجمع: "أتلذذ بمعاشرة الموتى"
•  بـ2000 جنيه.. جلابة فتيات الليل لسفاح التجمع قدمت له ابنتها

"معرفش يعني إيه صلاة"

س: هل يقوم والدك باصطحابك لأداء أي من مناسك الصلاة؟ (أفهمناه)

ج: أنا معرفش يعني إيه صلاة وأنا بابا مودنيش المسجد قبل كده

س: هل أبلغك والدك بطبيعة ديانتك؟ ( أفهمناه)

ج: أيوه هو قالي إن أنا مسلم

س: هل قام بتعليمك أيًا من تعليمات الإسلام أو أركانه؟ (أفهمناه)

ج: لا خالص، بس أنا بعرف أعمل حركات الصلاة، بس مش بفهم هما بيعملوا إيه أو بيقولوا إيه

س: هل شاهدت والدك طوال حياتك حال قيامه بأداء الصلاة؟ (أفهمناه)

ج: أنا عمري ما شفت بابا بيصلي

س: هل لديك أقوال أخرى؟ ( أفهمناه)

ج: لا

تمت أقواله وتُوقّع منه

وإلى القصة كاملة من واقع التحقيقات كما انفرد بها "تليجراف مصر"، والتي ننشرها تباعا على حلقات:

الحلقة الأولى:

انفراد بنص التحقيقات.. سفاح التجمع: أمي صدمتني جنسيًّا (١)

الحلقة الثانية:

انفراد بنص التحقيقات.. عشق ومخدرات وتصوير العلاقة الجنسية.. امرأة سيطرت على سفاح التجمع (2)

الحلقة الثالثة:

ننفرد بنص التحقيقات| خيانة وسعار جنسي.. لعبة الموت بين سفاح التجمع وزوجته (3)

الحلقة الرابعة:

انفراد بنص التحقيقات| سفاح التجمع: من بين كل الضحايا.. شبح "رحمة" يطاردني (4)

الحلقة الخامسة:

انفراد بنص التحقيقات| "ماراثون نفسي" بين النيابة وسفاح التجمع.. "معاشرة الأموات ومصادر دخله" (5)

الحلقة السادسة:

انفراد بنص التحقيقات| سفاح التجمع وضحية سور النادي الأهلي.. "تجربة أولى قتل" و"طلعة أولى دعارة" (6)

الحلقة السابعة:

انفراد بنص التحقيقات| "وعدها بالزواج".. أسرة "رحمة" أصغر ضحايا سفاح التجمع تكشف تفاصيل مثيرة (7)