انفراد بنص التحقيقات| القوادة أم شهد عن "سفاح التجمع": كورونا البداية وحوّر عليّا عشان يقتل ضحيته الأولى (14)

سفاح التجمع

A A

يواصل "تليجراف مصر" نشر النصّ الكامل لتحقيقات النيابة العامة في واقعة سفاح التجمع، الذي انفردنا به كاملا.

استدعت النيابة العامة هذه المرة القوادة التي كانت تجلب للمتهم "كريم.س" الفتيات، والتي كان من بينهن ابنتها "شهد".

جانب مأساوي آخر من القصة، يفصح عن الحياة السريّة لـ"الساقطات"، وتدرجهن في المهنة، والظروف التي أدت إلى تورّطهن في هذا "المستنقع".

حكت القوّداة "حنان" باستفاضة، عن ظروف نشأتها وخروجها من بلدها مطرودة، لتصل القاهرة، وتلحق بها ابنتها الصغيرة "فتحية".. لتواجهها النيابة بقائمة من التهم..

تفاصيل مثيرة في الحلقات السابقة، وأسرار خطيرة يكشفها السفاح واالتحقيقات مع الشهود في الحلقات المقبلة.

سفاح التجمع وضحية سور النادي الأهلي.. "تجربة أولى قتل" و"طلعة أولى دعارة"

وإلى نص التحقيقات:

س: ما اسمك ومحل إقامتك؟

ج: اسمي "حنان.م"، مقيمة بمساكن عين شمس

س: ما معلوماتك بشأن الواقعة محل التحقيق؟

ج: اللي حصل أنا شغالة في الدعارة وكنت بقف عند مساكن شيراتون (...) وكنت بشوف كريم هناك دايما وكنت أول مرة أتعرف عليه ركبت معاه العربية وكان متفق معايا إنه هيديني ألف جنيه وأنا ساعتها فرحت علشان مفيش حد بيدفع ألف جنيه.

لما ركبت معاه العربية وقفنا في منطقة شيراتون وفضل يعمل معايا حاجات جنسية، وقالي إحنا هنروح الشقة بس أنا زهقت منه علشان بيطول في الحاجات الجنسية ولما قولتله أنا عايزة أنزل قالي أنا هديكي 200 جنيه بس، وبعد كده نزلت وهو أخد مني رقم تليفوني.

كان بيروح عند مساكن شيراتون كتير وشاف هناك "شهد" بنتي اللي اسمها الحقيقي "فتحية"، وعرف إن أنا أمها وكانت بتركب معاه العربية وراحت معاه الشقة حوالي 10 مرات، وكان كل لما بيبقى عايز شهد بيتصل بيا وأنا ببعتهاله وفي يوم 15-11-2023 كريم اتصل بيا سألني على فتحية بنتي وأنا قلت له شهد (اللي هي فتحية) طفشانة مني..

"أنت بتحوّر ليه"

قبلها كان في واحدة كلمتني اسمها "بطة ملقاط"، وقالت لي في بنت غلبانة اسمها "آية" خديها عندك، وهي كويسة وهتشتغل معاكي، وأنا أخدتها وأول لما روحنا البيت أنا وهي قالت لي أنا جعانة وجبتلها أكل.

تنويه: "آية" هي نفسها "نورا"، هي نفسها "مجهولة الهوية" الضحية الأولى لـ"السفاح التجمع".

ساعتها كريم اتصل بيا تاني وقالي أنتي معندكيش أي بنت، قلت له أيوة عندي واحدة حلوة وجسمها مليان هتعجبك هجيبهالك، وقالي ماشي بس هي معاها بطاقة علشان الكمبوند مبيدخلش حد معهوش بطاقة، قلت له لا هي زي شهد معهاش بطاقة، وقلت له أنت بتحوّر ليه، هي مش شهد بتدخل عادي معاك.

قالي ماشي أنا جايلك بسرعة كمان نصف ساعة، وأنا قلت للبنت استحمي ونظفي نفسك وجبتلها هدوم من عندي وقلت لها فيه مصلحة بألف جنيه تتطلعي، قالت لي ماشي أطلع، وأنا روحت أنا والبنت اللي اسمها آية عند الجراج عند سلم المترو، وهو كان هناك كريم مستني..

"هيا هتروّق عليّا"

أنا والبنت ركبنا معاه العربية وهو إداني ألفين جنيه وقالي النهاردة عيد ميلادي وأنا عايز أتبسط وقالي هي هتروّق عليا أنا قلت له أيوة هي هتظبتك والبنت كمان قالت أيوة أنا هروق عليك وأنا أخدت الفلوس ونزلت علطول والكلام ده كان حوالي الساعة12 أو 12 ونص بالليل وكنا في الشتا وبعد حوالي ثلاث ساعات فضلت أتصل بيه مردش عليا..

تاني يوم على الظهر كده كلمني وبسأله فين البنت ومرجعتش ليه قالي أنا مشتها علشان مش مكيفاني، وقالي إنه مشاها علشان معفنة ومش عاجباه، وبعد حوالي شهر كلمني تاني بيسأل على شهد، قلت له لسه شهد طفشانة ومرجعتش وسألته هي البنت اللي كنت جايبهالك فين أنا مشوفتهاش تاني، قالي إنها فضلت عنده يومين ومشاها..

"خلاص تعالي أنتي"

وبعد كده سألني في بنات تانية معاكي ولا لأ، وأنا مكنش عندي حد، قالي خلاص تعالي أنتي وأنا روحت على الجراج بس لما أتاخرت عليه هو مشي راح على هليوبوليس، وكلمني قالي أنا هناك عايزة تيجي تعالي وأنا روحت له هناك وخدني على شقته اللي في الكمبوند وفضلت عنده من الساعة 2 الظهر لحد المغرب، لما روحت وعاشرني لحد أما زهقت وبعد كده قالي نضفي الشقة قلت له ماشي، وأنا بنضف لقيت سلاسل كتير وحظاظات كتير جلد وأخدت منهم سلسلتين من غير ما هو يعرف وده كل اللي حصل.

5 نساء حول سفاح التجمع.. سامي عبد الراضي يكشف أسرارا خطيرة

س: متى تحديدا بدأت معرفتك بالمتهم "كريم. س"؟

ج: أنا أعرفه من حوالي سبع شهور أو أكثر من عند مساكن شيراتون

س: ما هي ظروف تقابلك مع المتهم سالف الذكر؟

ج: أنا أول مرة شفته كنت واقفة في شيراتون لوحدي ونده عليا أركب معاه العربية

س: ما الذي طلبه منكِ المتهم "كريم.س" حال معرفتك به؟

ج: أنا أول لما ركبت معاه العربية شربت آيس وطلب يعاشرني و(...) وأنا كنت بعمل كده بس هو كان بيفضل وقت كتير في الحاجات دي وأنا زهقت منه، وطلب مني أروح معاه البيت وأنا رفضت، وبعد كده نزّلني من العربية وإداني 200 جنيه بس، قلت له فين الألف جنيه، قالي كده حلو عليكي ولو جيتي معايا البيت هديكي ألف جنيه وأنا رفضت، بس أخد مني رقم تليفوني.

س: ما هي كيفية تعرف المتهم سالف الذكر على ابنتك المدعوة فتحية؟

ج: أنا كنت واقفة في شيراتون زي ما بقف دايما وكان معايا شهد ولقيت كريم شاورلي ورحتله وعرفته إن شهد تبقي بنتي وسبتها تركب معاه وخدها الشقة بتاعته.

س: ما هي الفئة العمرية لابنتك سالفة الذكر وبيانتها تحديدا؟

ج: بنتي اسمها "فتحية.ق" وعندها 18 سنة والشهره بتاعتها شهد.

س: ما هي عدد المرات التي قام المتهم باصطحاب ابنتك معه تحديدا؟

ج: هي راحت معاه كتير حوالي عشر مرات.

س: هل كنتي على علم بذهاب ابنتك للمتهم سالف الذكر؟

ج: أيوة، هو كل ما كان بيعوزها كان بيكلمني لأن فتحية معهاش تليفون

س: ما هي الفترة الزمنية التي كانت تقطن فيه ابنتك داخل مسكن المتهم كريم؟

ج: فتحيه كانت بتروح له شقته من الساعه عشرة بالليل لحد الساعة 8 الصبح.

س: ما هي الأفعال التي أتاها المتهم حال اصطحاب ابنتك المدعوة فتحية بمسكنه؟

ج: بنتي قالت لي اللي بيحصل معاها وكانت بتقولي إنه بيشربها آيس كتير وبيعاشرها بعنف وبيقعد كتير بس هي بتعرف تظبطه علشان كده هو بيحب شهد تروح عنده وكان بيطلب منها (....)

س: ما هو المقابل المادي الذي كان المتهم يدفعه نظير ذلك؟

ج: هو مرة يديني ألف جنية ومرة يديني 1500 جنيه على حسب، والمرة الأخيرة إداني 2000 جنيه

س: من القائم بالتحصل على ذلك المبلغ المالي؟

ج: الفلوس أنا اللي كنت بخدها وبدي لفتحية بنتي منها نسبة

س: متى تحديدا اتّصل المتهم بكي وطلب ابنتك المدعوة فتحية كما قررتي سلفا؟

ج: الكلام ده حصل في الشتا في شهر 11 اللي فات

س: ما هي كيفية تواصل المتهم كريم معك تحديدا؟

ج: هو كان بيطلبني علي تليفوني رقم (...) من تليفونه رقم (...)

س: ما هو مضمون الحوار الذي دار بينك وبين المتهم آنذاك؟

ج: هو قالي إن النهارده عيد ميلادي وعاوز اتبسط وطلب شهد قلت له شهد طفشانة ما أنت عارف، وقالي أنتي معندكيش أي بنت، قلت له أيوة عندي واحدة حلوة وجسمها مليان هتعجبك هجبهالك، وقالي ماشي بس هي معاها بطاقة علشان الكمبوند مبيدخلش حد معهوش بطاقة، قلت له إزاي طب ما شهد معهاش بطاقة وبتدخلك على طول أنت بتحوّر ليه، قالي ماشي أنا جايلك على طول مسافة الطريق نصف ساعة بالكتير وأكون عندك.

"النهارده عيد ميلادي"

س: ما التصرف الذي بدر منكي آنذاك؟

ج: قلت للبنت اللي اسمها آية فيه مصلحة بألف جنيه تتطلعي قالت لي ماشي أطلع وقلت لها تاخدي دش وتنظفي نفسك ودخلت الحمام معاها وجبتلها هدوم نظيفة من عندي ونزلت أنا وهي رحنا عند الجراج عند سلم المترو، وهو كان هناك مستني وأنا والبنت ركبنا معاه

س: ما هي طبيعة الاتفاق الذي دار فيما بينك وبين المتهم كريم حال تقابلك معه آنذاك؟

ج: اتفقت معاه إن أجيب له البنت ويديني ألف جنيه، ولما قابلته ركبنا معاه العربية وشاف
البت راح طلّع 2000 جنيه، وقالي خدي النهارده عيد ميلادي وعاوز اتبسط.

"متخفيش من كريم"

س: ما الذي حدث عقب ذلك؟

ج: أنا نزلت من العربية ومشيت وأخدت الـ 2000 جنيه

س: هل هناك حوار دار بينك وبين تلك الفتاة آنذاك؟

ج: أنا قلت لها ليكي 1000 جنيه معايا وقلت لكريم متأخرهاش والنبي يا كريم وقلت لها متخفيش من كريم.

س: متى تحديدا قابلتي المتهم سالف الذكر رفقة تلك الفتاة؟

ج: أنا قابلته الساعة 12 أو 12:30 بالليل يوم 15-11-2023

س: ما هي الفترة الزمنية التي ظلت تلك الفتاة برفقة المتهم؟

ج: هي راحتله من 12 أو 12:30 بالليل، وأنا حوالي الساعة 4 الفجر قعدت أكلمه وكان تليفونه بيدي مشغول لحد أذان الظهر لقيته كلمني.

"مش بترد عليا ليه والبت فين؟"

س: ما هو الحوار الذي دار فيما بينك وبين المتهم آنذاك؟

ج: أنا قلت له أنت حاطتني على المشغول ليه ومش بترد عليا وسألته البت فين، قالي إن هو مشاها لأنها مكيفتوش

س: ألم تقومين بمحاولة التواصل مع تلك الفتاة حتى تعلمي إلى أين مصيرها؟

ج: سألت البنات اللي بتقف في شيراتون وقالولي مشفنهاش

س: هل قمتي بالإبلاغ بشأن اختفاء تلك الفتاة؟

ج: لا

س: ما الذي حال دون ذلك؟

ج: لأن معظم البنات اللي بيقفوا في الشيراتون بيكونوا هربانين من أهلهم ومحدش بيعرف هما أصلهم منين ولا ساكنين فين وممكن يركبوا مع أي حد ويقعدوا في شقة أي حد بالأيام

س: ما هي المواصفات الجسدية لتلك الفتاة والملابس التي كانت ترتديها تحديداً؟

ج: هي بيضاء وجسمها مليان حبة وشعرها أصفر في أسود طويل وصدرها كبير، و(...) وشكلها لا رضّعت ولا خلّفت، وكانت لابسة بنطلون جينز مقطع من عند الركبة وتحت منه بنطلون كارينا أسود وتي شرت نص كم أبيض وبادي كت أبيض بحملات وشوز أسود.

س: هل قام المتهم كريم بمعاودة الاتصال بكِ مرة أخرى؟

ج: أيوة هو اتصل بيا وطلب مني فتحية بنتي تروحله وأنا قلت له إنها لسه طفشانة، قالي عندك حد قلت له لا مفيش قالي خلاص تعالي أنتِ.

"سكة بطة ملقاط"

س: ما هي كيفية تعرفك على تلك الفتاة المدعوة "آية"؟

ج: بعد لما شهد سابت البيت فيه واحدة أعرفها من الشارع من عند مساكن شيراتون اسمها بطة ملقاط، وقالت لي في بنت غلبانة اسمها آية خديها عندك وهي كويسة وهتشتغل معاكي وأنا أخدتها وروحنا البيت أنا وهي، قالت لي أنا جعانه جبتلها أكل، وكريم اتصل ساعتها وقلت لها استحمي وحضرت لها هدوم من عندي ولبست ونزلنا.

س: ما هي الفترة الزمنية التي مكثتها تلك الفتاة برقفتك؟

ج: مكملتش ساعتين على بعض وكريم اتصل ساعتها ونزلنا له.

"هربانين من أهلهم"

س: هل قمتي بالحصول على ثمة تحقيق شخصية أو ثمة مستندات أو متعلقات خاصة بتلك
الفتاة؟

ج: هي مكنش معاها أي حاجة خالص ولا حتى هدوم، ولما قلت لها أنتي منين، قالت لي إنها من الفيوم حتة اسمها كفر الشيخ بلد أم كلثوم، وأنا زيّ ما قلت إن البنات اللي بيقفوا عند الشيراتون مبيبقاش معاهم بطايق ومعظمهم هربانين من بيوتهم وأهلهم

س: هل كان المتهم كريم على علم بطبيعة الفتيات التي تعمل معكِ من أنهم ليس لديهم ثمة بيانات أو أهلية يتابعون خط سيرهم؟

ج: أكيد لأني زي ما قلت إن معظم البنات اللي في الشيراتون ملهمش أهل ومحدش يعرف أصلهم منين ولا حد هيسأل عنهم، وهو كمان سألني البنت معاها بطاقة ولا لأ.

س: من هي المدعوة بطة ملقاط تحديداً؟

ج: هي واحدة بتشتغل معانا في الشارع في الدعارة وحرامية بتسرق علشان كده مسمينها ملقاط وبتشغّل البنات في الدعارة

س: هل قمتي بالاستعلام من سالفة الذكر عن بيانات وأهلية المجني عليها مجهولة الهوية المدعوة آية؟

ج: لا، لأن البنات دي معظمهم طفشانين من أهلهم

س: هل سبق لكِ أن قمتي بإيواء أي من الفتيات على نحو ما قررتيه؟

ج: لا، أنا مكنش في حد قدام مني يشتغل معايا ولو كان في حد جه كنت شغلته

س: هل سبق لكِ الذهاب إلى مسكن المتهم سالف الذكر؟

ج: أيوة أنا روحت قبل كده مرة واحدة

س: متى تحديدا قمتي بالذهاب لمسكن المتهم؟

ج: من فترة تقريبا شهرين كنا بالنهار حوالي الساعة 2 الظهر

س: ما هي كيفية تقابلك مع المتهم آنذاك؟

ج: ساعة ما كلمني كنت في حتة اسمها الجراج، كان متفق معايا يقابلني فيها وكلمته قالي أنتي اتأخرتي وأنا مشيت روحت هيليوبلس، قلت له خلاص هركب تاكسي وأجيلك بس تحاسبيلي على التاكسي قالي ماشي، وروحت قابلته في هيليوبلس وروحنا الشقة.

س: ما هي الأفعال التي أتاها المتهم حال تواجدك بمسكنه؟

ج: أنا لما روحت معاه الشقة دخلنا الأوضة اللي فيها استوديو وفضلنا نمارس الجنس حوالي نص ساعة، وبعد كده أنا تعبت وزهقت منه وابنه نده عليه وإحنا مع بعض في الأوضة راح قالي ساعة اطلعي نظفي الشقة كلها وفعلا عملت كده

س: ما هي الفترة الزمنية التي مكثتيها بمنزل المتهم؟

ج: أنا قعدت معاه من 2 الظهر لحد المغرب

س: ما هو المقابل المادي الذي تقاضيته من المتهم نظير قدومك لمسكنه؟

ج: أنا أخدت منه 1000 جنيه

س: ما هي الأماكن التي قمتي بتنظيفها بمنزل المتهم آنذاك؟

ج: أنا نظفت الأنتريه والحمام والمطبخ وأوضة ابنه والأوضة بتاعته

س: هل تلاحظ لكِ وجود ثمة آثار دماء آدمية حال قيامك بتنظيف غرفة نوم المتهم أو بأي من غرف المنزل؟

ج: لا أنا مختش بالي من حاجة ساعتها

"أنا مش ناقص قرف"

س: هل تلاحظ لكِ وجود ثمة متعلقات لسيدات أو فتيات حال تواجدك بمسكن المتهم؟

ج: أنا شفت سلاسل وحظاظات حريمي لما كنت بروّق البيت وأخدت منهم اثنين من غير ما أقوله

س: هل كان يتواجد مع المتهم ثمة أشخاص آخرين حال تواجدك بمسكن المتهم؟

ج: هو كان معاه ابنه قاعد بره في الصالة بيلعب

س: هل تلاحظ لكِ وجود ثمة آلات مراقبة بمنزل المتهم آنذاك؟

ج: أنا مختش بالي ساعتها في كاميرات ولا لأ

س: هل قمتي بمعاودة سؤال المتهم بشأن الفتاة المدعوة آية والسابق إرسالها إليه آنذاك؟

ج: سألته وحلف بالله إنه مشّاها وقالي أنا مش ناقص قرف هقعد الأشكال دي عندي ليه

ملحوظة: قمنا بعرض الصور المرفقة بتقرير قسم الأدلة الجنائية الخاص بالمجني عليها مجهولة الهوية، وكذا الصور المرسلة من الطب الشرعي على الماثلة أمامنا وأقرت أنها ذات المواصفات الجسدية للمدعوة آيه من حيث الفرق الموضح بأسنان المجني عليها ومواصفاتها الجسدية وانهارت في البكاء.

"راجعت الحوار في دماغي"

س: ما قولك فيما تم عرضه عليك الآن من صور لجثمان الأدلة الجنائية؟

ج: اللي أنا شفتها في الصور دي آية وأنا عرفتها من الفرق اللي في سنانها وجسمها المليان ولون شعرها ووشها المدور والتيشيرت الأبيض اللي لابساه والبنطلون الكارينا الأسود اللي لابساه لأنه كان متخيّط من تحت، ولكن الحظاظه اللي مكتوب عليها ليفربول والسلسله اللي في رقبتها دي مكنتش نازلة من عندي بيهم وأكيد لبستهم من عند كريم وأنا مكنتش أعرف إن كريم ممكن يقتلها وأنا فهمت دلوقتي هو طلب إنها ميكنش معاها بطاقة ليه علشان محدش يتعرف عليها.

س: ما قولك فيما هو ثابت بتقرير الطب الشرعي من وجود دماء خاصة بالمتهم كريم على ملابس المجني عليها ووجود خلايا بشرية للمتهم بقلاميات أظافر المجني عليها مجهولة الهوية؟

ج: أكيد هو اللي قتلها والطب الشرعي مش هيكذب وأنا اتأكدت من كده لما راجعت الحوار في دماغي وإصراره إن البنت ميكنش معاها بطاقة.

ملحوظة: قمنا بفض حرز الهاتفين المحمولين المضبوطين مع المتهم بعد التأكد من سلامة أختامهم وصحة بياناتهم وقمنا بعرض الصور ومقاطع الفيديو على الماثلة وأقرت أن الشخص الظاهر بالصور هو المتهم كريم وأنه لا يوجد ثمة صور أو مقاطع فيديو عليها مجهولة الهوية.

س: هل شاهدتي شخص المتهم كريم بالصور ومقاطع الفيديو السابق عرضها عليكِ؟

ج: أيوة

س: هل تلاحظ لكِ من خلال عرض الصور ومقاطع الفيديو وجود ثمة صور أو مقاطع للمجني عليها مجهولة الهوية؟

ج: لا مشفتش صور ليها خالص

س: من هو مالك خط الرقم (...)؟

ج: الخط باسم جوزي بس أنا اللي بستعمله

س: ما قولك فيما جاء باستعلام شركات المحمول من كون الخط رقم (...) باسم "ماهر.ح"؟

ج: الخط فعلا باسم جوزي، بس أنا اللي بستخدمه في تليفوني لأن جوزي هو اللي شاري الخط ده ليا، وهو نفس الخط اللي كريم كلمني عليه ساعة ما وديتله البنت اللي اسمها آية.

س: ما قولك فيما جاء باعتراف المتهم بتحقيقات النيابة العامة والثابت بها قيامه بارتكاب واقعة قتل المجني عليها سالفة الذكر على نحو ما قررتيه؟

ج: أكيد ده اللي حصل وأنا شهدت شهادة حق

س: هل من ثمة علاقة أو خلافات بينك وبين أي من أطراف الواقعة؟

ج: لا

س: هل لديكِ أقوال أخرى؟

ج: لا

تمت أقوالها وتُوقِّع عليها

سلمته ابنتها مقابل 2000 جنيه.. حكاية "جلابة الفتيات" لسفاح التجمع

في ضوء ما جاء بشهادة الماثلة من أقوال والذي يمثل جريمة قائمة، وعليه أخبرناها أنها في حل من اليمين القانونية وأحطناها علما بذلك وأمرنا بإلقاء القبض عليها.

بمناظرتها، ألفيناها سيدة في منتصف العقد الرابع من العمر سمراء البشرة ترتدي عباءة سوداء، وبسؤالها عما إذا كان بها ثمة إصابات أجابت بالنفي.

وبسؤالها شفاهيا عن التهمة المسندة إليها بعد أن أحطناها علما بها وبعقوبتها وأن النيابة العامة هي التي تباشر معها إجراءات التحقيق، أقرت بها.

وبسؤالها عما إذا كان لديها محام يحضر معها إجراءات التحقيق أجابت نفياـ وقمنا بندب المحامي مصطفى عبده لحضور إجراءات التحقيق برفقة المتهمة ووعد بسداد الدمغة.

ولمناسبة تواجد المتهمة أمامنا رأينا استجوابها بالآتي:

س: ما هي تفصيلات اعترافك؟

ج: وأنا عندي 13 سنة عملوا ليا شهادة تسنين علشان يجوّزوني واتجوزت راجل كبير في السن اسمه قطب، وخلّفت منه بنتي شهد اللي اسمها الحقيقي فتحية، ومكملتش معاه كتير، وبعد كده طلقني، وأمي أخدت البنت مني ونزلت على مصر، وأول لما نزلت روحت محطة مصر وفضلت أنام تحت الكوبري واتعرفت على ناس كتير لحد لما اشتغلت مع واحدة اسمها رضا صرصار، رقاصة، وبعد 10 أيام شغل عندها، قالت لي أنا عايزة أجوّزك طليقي اللي اسمه ماهر، قلت لها ماشي وأنا اتجوزته 3 شهور عرفي ولما حملت منه كتب عليا رسمي، وخلفت منه اتنين سيف عنده 7 سنين، وفرح عندها 8 سنين.

وفتحية بنتي وهي عندها حوالي 5 سنين جاتلي مصر وجوزي ماهر يعتبر هو اللي مربيها لحد ما كبرت، وكنت بشتغل شحاتة أنا وبنتي فتحية لحد ما جت كورونا وفتحية عرفتني على منطقة الشيراتون واشتغلت في الدعارة أنا وهي، كنا نركب عربيات مع أي زبون زي كريم مثلا، ونعمله اللي هو عاوزة ونمتعه واخد 200 جنيه وساعات في زبون عاوزنا في شقته كنا نروح أو ببعت فتحية بنتي.

س: ما هي نشأتك تحديداً؟

ج: أنا مولودة في محافظة الشرقية وأبويا كان شغال قهوجي وأمي مش بتشتغل، وعندي أربع إخوات وكلهم متجوزين، وأنا مدخلتش مدرسة خالص ولما كبرت وبقى عندي 13 سنة عملوا ليا شهادة تسنين علشان يجوزوني واتجوزت راجل كبير في السن اسمه قطب وخلفت منه بنتي شهد اللي اسمها الحقيقي فتحية.

وأنا مكملتش معاه كتير وبعد كده طلقني، وبعد لما أبويا مات مقتول في مصر وهو عند واحد صاحبه وإخواتي رموني أنا وبنتي، وأمي رمتني في الشارع وخالتي هي كمان رمتني أنا وبنتي ومبقتش عارفة أروح فين وساعتها أنا نزلت على مصر وأنا عندي 13 سنة.

أمي مرضيتش تديني بنتي تاني، أول لما نزلت روحت محطة مصر وفضلت أنام تحت الكباري ولاقيت واحدة قالت لي أنتي منين وأكلتي ولا لأ، قلت لها أنا عايزة أكل علشان جعانة، قالت لي ماشي 10 دقائق وجيالك ولاقيت بعدها الحكومة جاية تاخدني.

بعد لما طلعت فضلت أتعرف على ناس كثير منهم اللي تخدني تشغلني رقاصة وكنت بشتغل في كوافير واللي مش بتديني فلوس بروح أشتغل رقاصة في حته ثانية لحد لما اشتغلت مع واحدة اسمها رضا صرصار رقاصة، وبعد 10 أيام شغل عندها قالت لي أنا عايزة أجوّزك طليقي اللي اسمه ماهر قلتت لها ماشي وأنا اتجوزته ثلاثة شهور عرفي ولما حملت منه كتب عليا رسمي، وخلفت منه اتنين سيف عنده 7 سنين، وفرح عندها 8 سنين، وفتحية بنتي وهي عندها حوالي خمس سنين جاتلي مصر وجوزي ماهر يعتبر هو اللي مربيها.

س: منذ متى تحديدا وأنتِ تباشرين ذلك الفعل؟

ج: أنا اشتغلت في الدعارة من ساعة كورونا تقريبا في 2019.

س: هل كانت نجلتك المدعوة فتحية تمارس ذلك الفعل معكِ منذ ذلك الحين؟

ج: أيوة وهي اللي عرفتني على الشيراتون من 2019 أيام كورونا

س: هل كان والد ابنتك المدعو قطب على علم بما تقومين به من أفعال تجاه نجلتك؟

ج: إحنا منعرفش عنه حاجة من زمان وبنتي معايا من وهي عندها 5 سنين

س: ما هو عمر ابنتك تحديدا إبان تلك الفترة؟

ج: كان حوالي 15 سنة

س: ما هي طبيعة الأعمال التي تقومون بممارستها في ذلك الشأن؟

ج: إحنا بنركب مع الزبون وحسب ما يطلب بنعمله، في زباين بيكونوا عاوزين يناموا معانا في العربية وفي زباين بتبقي عاوزنا في البيوت ننام معاهم.

س: ما هو المقابل المادي الذي تتحصلون عليه من جراء ذلك الفعل؟

ج: على حسب الزبون، بس أقل حاجه لو نام معانا في العربية 200 جنيه، ولو روحنا أي بيت بيبقي أقل حاجة 1000 جنيه

س: من القائم على تحصيل المبالغ تلك تحديداً؟

ج: أنا اللي باخد الفلوس وبدي لفتحية بنتي جزء منها

س: أين تحديدا تقومون باستقطاب راغبي المتعة من الرجال؟

ج: إحنا بنقف دائما في الشيراتون لأنه معروف إن هناك قوادات وناس زيي أنا وفتحية بنتي

س: ما الداعي من وراء قيامك بارتكاب ذلك الفعل؟

ج: كنت محتاجة الفلوس ومفيش شغل وأنا أصلا عندي السكر ومش بقدر اشتغل أي حاجة وجوزي مش بيشتغل وبنتي فتحيه بتساعدني في الشغلانة دي

س: هل يعاونك أحد في ذلك؟

ج: بنتي فتحية بتشتغل معايا

س: هل ابنتك سالفة الذكر على علم بطبيعة تلك الجريمة؟

ج: أيوة، وهي اللي قالت لي على شارع الشيراتون إن فيه شغل

س: هل تملكين ثمة ولاية أو وصاية أو سلطة رقابية أو أدبية على ابنتك فتحية؟

ج: أنا بنتي عندها 18 سنة وكبيرة مش صغيرة وطفشانة من 6 شهور ومعرفش حاجة عنها

س: هل نجلتك سالفة الذكر بكر أم ثيّب؟

ج :أنا بنتي اتفتحت من زمان معرفش مين اللي فتحها وكانت حامل وسقطت بعد 6 شهور حمل

س: أين تقطن ابنتك المدعوة فتحية؟

ج: أنا معرفش عنها حاجة بقالي 6 شهور لأنها طفشانة من البيت

س وهل من ثمة وسيلة للتواصل فيما بينك وبين ابنتك سالفة الذكر؟

ج: لا، هي أصلا معهاش تليفون ومعرفش عنها حاجة من 6 شهور

س: ما هي طبيعة عمل زوجك المدعو ماهر؟

ج: هو شغّال في الموالد وبيعمل حاوي

س: هل زوجك سالف الذكر على علم بطبيعة عملك وما تقترفيه من أفعال منافية للآداب؟

ج: أنا جوزي رجل كبير عنده 54 سنة وميعرفش إني شغالة في الدعارة

س: هل قمتي باستقطاب ثمة فتيات أخريات لتشغيلهم في ذلك المجال؟

ج: لا، أنا شغالة أنا وبنتي فتحية بس، وأول مرة كنت أشغّل حد عندي كانت آية اللي كريم قتلها زي ما قلت قبل كده.

س: ما سبب قيامك بتشغيل المدعوة آية وإيوائها؟

ج: أنا شغلتها علشان زي ما قلت إن الست اللي اسمها بطة ملقاط جابتهالي وقالت لي إنها بنت غلبانة وخديها عندك وهي كويسة وهتشتغل معاكي وأنا أخدتها.

س: ما هي بيانات المدعوة بطة ملقاط تحديدا؟

ج: أنا معرفش غير إن اسمها كده وبتشتغل قوادة في الشيراتون برضوا ومعرفش عنها حاجة

س: ما هي آخر مره قمتي باستقطاب الرجال راغبي المتعة؟

ج: أنا آخر مرة وقفت فيها في الشيراتون وعملت كده من حوالي شهر تقريبا

س: أنتِ متهمة بالتعامل في شخص طبيعي بالبيع والاستخدام، وهي المجني عليها مجهولة الهوية، وكان ذلك بتلقيكِ من الغير مبالغ مالية نظير حصوله على موافقتك على الاتجار بالمجني عليها حال كونك لكِ سيطرة عليها وكان ذلك التعامل بقصد الاستغلال في أعمال الدعارة والاستغلال الجنسي، وقد نتج من ذلك وفاة المجني عليها على النحو المبين بالأوراق؟

ج: أيوه الكلام ده حصل بس مكنتش أعرف إن كريم هيقتلها

س: أنتِ متهمة بالتعامل في شخص طبيعي وذلك بالبيع والاستخدام، وهي المجني عليها نجلتك فتحية، وكان ذلك بتلقيكِ من الغير مبالغ مالية نظير حصوله على موافقتك على الاتجار بالمجني عليها حال كونك لكِ سيطرة عليها وكان ذلك التعامل بقصد الاستغلال في أعمال الدعارة والاستغلال الجنسي وكان ذلك حال كونها لم تتجاوز الثمانية عشرة عاما من عمرها وذلك على النحو المبين بالأوراق؟

ج: أيوه الكلام ده حصل وأنا بنتي شغالة معايا من أيام كورونا

س: أنتِ متهمة بارتكاب أعمال الدعارة وتسهيلها وذلك على النحو المبين بالتحقيقات؟

ج: الكلام ده حصل وأنا شغالة في الدعارة من 2019 علشان مليش مصدر دخل

س: هل لديكِ أقوال أخرى؟

ج: لا

تمت أقوالها وتوقّع منها

ملحوظة: الحاضر مع المتهمة طلب إخلاء سبيلها تأسيساً على انتفاء مبررات الحبس الاحتياطي في حق المتهمة، حيث إن للمتهمة محل إقامة ثابتا ومعلوما ولا يُخشى عليها من الهرب.

وإلى القصة كاملة من واقع التحقيقات كما انفرد بها "تليجراف مصر"، والتي ننشرها تباعا على حلقات:

الحلقة الأولى:

انفراد بنص التحقيقات.. سفاح التجمع: أمي صدمتني جنسيًّا (١)

الحلقة الثانية:

عشق ومخدرات وتصوير العلاقة الجنسية.. امرأة سيطرت على سفاح التجمع (2)

الحلقة الثالثة:

ننفرد بنص التحقيقات| خيانة وسعار جنسي.. لعبة الموت بين سفاح التجمع وزوجته (3)

الحلقة الرابعة:

انفراد بنص التحقيقات| سفاح التجمع: من بين كل الضحايا.. شبح "رحمة" يطاردني (4)

الحلقة الخامسة

انفراد بنص التحقيقات| "ماراثون نفسي" بين النيابة وسفاح التجمع.. "معاشرة الأموات ومصادر دخله" (5)

الحلقة السادسة